Latest News

COVID-19 hri kaite tha taka enkawl dam turin sawrkarin theihtawp a chhuah - Health Minister

Health Minister Dr. R. Lalthangliana chuan COVID-19 hri kaite tha taka enkawl dam turin sawrkarin theihtawp a chhuah thu a sawi.

Nimin-a SAD Conference Hall, Aizawl-a COVID-19 dona kawnga inpuahchahna kal lai mek chungchang thlirhona hunah he thu hi sawiin Health Minister chuan kan dinhmun tawh a khirh mek laia Kohhran, Pawl ho leh mimal ten Chief Minister’s Relief Fund a kan mihringpui he hripui vanga harsatna tawkte tanpuina tur leh he hripui leng laka kan him theihna tura sawrkar hmalakna tihchak nana sum an thawh thin chu ropui a tih thu a sawi a, hei hian hripui do tura kan tanrual zia a tilang chiang em em a ni, a ti bawk.

He thutkhawm ah hian Medical Operational Team on COVID-19 (MOT) Chairman, Dr. ZR. Thiamsanga MLA chuan Mizoram-a COVID-19 hripui leng mek dolet turin MOT chuan kan dinhmun uluk taka an zirchian hnuah rawtna chi hrang hrang sawrkarah an thlen thin thu sawiin, heng zingah hian sawrkar hnathawkte thawhlawm thawh tura sawm rawtna pawh a tel tih a sawi a. An rawtna thlen chi hrang hrangte sawrkarin a ngaih pawimawh saka, hma a laksak avangin lawmawm a tih thu a sawi bawk. Dr. ZR. Thiamsanga chuan MOT member te chu Mizoram chhunga Doctor chi hrang hrang sawrkar hnuaia thawkte, Non-Government Hospital Association Mizoram aiawhte, Private a practice Doctor bakah Doctor pension tawhte an tel thu a sawi bawk.

He thutkhawm hian COVID-19 hri kai, sawrkarin inenkawlna tur a buatsaih hmuna enkawlte chu Mizoram State Health Care Scheme (MSHCS) hnuaiah an inziaklut a nih chuan, he Scheme hnuaiah hian inenkawlna senso cheng nuai 2 thlengin an bill thei tih sawilan a ni a. Zoram Medical College (ZMC)-a Oxygen hman man lak tura thupek awm chungchang pawh sawi chhuah niin, he thupek hi sawrkar hriatpui loha tih a nih vangin niminpiah khan thiah nghal a nih thu sawi a ni a. He thupek chhuah chungchanga mawhphurtu chu sawrkar hotute hriatpui loha thupek a chhuah chhan sawifiah tura hriattirna ‘Show Cause Notice’ pek a nih thu tarlan a ni bawk.

Comments

Chhiar Hlawhte