NH. 54 Serchhip by-pass a Lei (Bridge) dawh tura hnathawh dan enfiah a ni

National Highway-54 in Serchhip khawpui a helna turah cheng vbc. 15 sengin Darnam kawr kanna tur Lei dawh hna chu thawh mek a ni a, he hna thawh mek hi Inrinni khan Serchhip a thuthar thehdarhtu thenkhat te leh Serchhip Sub-Hqrs. YMA Vigilance & Monitoring Committee te chuan an tlawh.

NHIDCL hnuaia KRAM Infracon Pvt. Ltd. ten Serchhip khawpui helna tur NH. 54 siam hna an thawh mek hi Kikawn atanga intanin Sailiamkawn-ah a chhuak dawn a, Sailiamkawn-a a rawn chhuah hma hian Sesah lui leh Darnam lui infinna bulah kawr kanna turin meter 150-a thui Lei dawh a ni dawn a, he Lei dawh tur atan hian kum kalta December thla atang khan hna thawh tan niin Lei dawh chhunga hna thawhna tur hian lui kawr-ah tui luanna tur meter 140-a thui Hume Pipe phumin hei hi zawhfel a nih hnuah tunah hian a chung dawlzawl hna chu ngawrh taka thawh mek a ni.

He Lei dawh hna viltu Engineer te chuan helai hmuna Hume Pipe phuam a nih chhan chu Lei innghahna tur structure an siam te tuilian in a laklohna tur a ni tih an sawi a, Hume Pipe te chu foundation uluk taka siam anih hnua PCC hmanga char beh vek an nih thu sawiin, Hume Pipe hi tlar nga a phum niin, a vaiin Hume pipe 280 an hmang tih an sawi a ni. Engineer te chuan Hume Pipe te chu hman reng tur a ni dawnlo tih sawiin, Lei dawh an peihfel hunah chuan an laksawn leh vek tur thu an sawi a. Hume Pipe inkar ah hian lei chhunkhah niin, leivung Cubic Metre sang li atanga sang nga zet chhun a ni dawn a, zawhna chhangin Company Engineer te chuan leivung tam tak chhung mahse Hume pipe phum te chuan an dawlzo ngei dawn niin an sawi.

Serchhip Sub-Hqrs. YMA Vigilance & Monitoring Committee te hi Serchhip Sub-Hqrs. YMA President, Kawlthuama chuan hovin an zawhna chhangin Company hotute chuan Fur ruahtui a tlak zawh hun, kumin September thla emaw, October thla ah emaw chuan Lei dawh hna tak tak an tan theih an inbeisei tih sawiin, kum hnih chhungin dawh zawh hman an in beisei tih an sawi bawk. Lei hi concrete, RCC-a dawh tur niin niin Arch Bridge, Lei hnuailam kual chi anga dawh a ni dawn tih an sawi a. An hnathawh tawh chin chu tha thawkhat-a an ngaih thu YMA hruaitute chuan an sawi bawk a ni.

NH. 54 Serchhip by-pass Road-a he Lei dawh tur hi Mizoram-a Lei sei ber ber te zinga tel tura ngaih a ni a, meter 150-a thui ni tura ruahman niin kawr chhuat atanga teh-a lei sang ber turte zing ami a ni bawk a, Lei dawh tur hi meter 10-a zau tur niin a sir tawn tawn ah meter 1.5 a zau mihring kalna tur a awm dawn bawk a ni.