Latest News

Mizoram-ah COVID-19 hri kai hmuh belh zel an ni

Mizoram-ah nikhat-a COVID-19 hri kai hmuhchhuah zat ala tlahniam hlei thei lova, Inrinni-a Sample enfiah 3462 atangin COVID-19 hri kai mi 214 zet hmuhchhuah belh leh an ni.

Inrinni khan ZMC Laboratory-ah Sample 1597 enfiah niin heng atang hian hri kai65 hmuh an ni a, heng te hi Aizawl District mi vek niin hri kai lanchhuahna nei mi 10 leh hri kai lanchhuahna neilo 55 an ni a, hri kai tawh nen inkawmhnaihna nei an ni hlawm.

District hrang hranga TrueNat Laboratory-ah Sample 201 enfiah niin heng atang hian hri kai mi 5 hmuh an ni bawk a, Lunglei District-a Tlabung-ah mi pathum leh Champhai District-ah 2 an ni a, an zinga 4 te hi hri kai tawh nen inkawmhnaihna nei niin pakhat hi tunhnaia State pawn atanga rawn haw a ni thung.

Inrinni khan Mizoram-ah Rapid Antigen Test hmangin Sample 1664 enfiah niin hri kai mi 144 hmuh an ni a, an zinga mi 86 te chu taksa a hri kai lanchhuahna nei niin midang 58 te chu hri kai lanchhuahna neilo an ni thung. RAgT hmanga hri kai hmuhchhuah zinga 93 hi Aizawl District ami an ni a, Aizawl Saron Veng-ah hri kai 21 zet hmuhchhuah niin Veng mal-a hri kai hmuhchhuah tamna ber a ni. Lunglei District-a Tlabung ah hri kai mi 15 hmuh an ni bawk a, Lawngtlai District-ah hri kai mi 14 hmuh niin Serchhip District-ah hri kai mi 12 hmuh an ni a, Siaha District-ah 4, Mamit District-ah 3, Kolasib District-ah 2 leh Saitual District-ah hri kai mi pakhat hmuh an ni bawk.

Inrinni khan Mizoram-a COVID-19 hri kai mi 215 te chu enkawl dam niin anmahni enkawlna hmun atanga chhuahtir an ni a, nimin khan hri kai mi 103 te chu enkawl dam ni leh bawkin heti hian nimin tlai dar 5:00 thlenga Mizoram-a hri kai enkawl dam chu 7839 an ni ta a, hei hi Mizoram-a hri kai hmuhchhuah tawh 10,220 atanga chhutin za zela 76.85 a ni a, tunah hian hri kai enkawllai 2348 an la awm bawk a ni.

Mizoram-ah hri kai boral an awm belh zel :

Mizoram-a COVID-19 hri kai zingah Inrinni leh nimin khan nunna chan mi 3 an awm. Inrinni chawhnu dar 2:50 khan ZMC- enkawllai Tawktiali (63), Electric Veng Aizawl chu COVID Pneumonia vangin a boral a, Tawktiali hian tun thla ni 11 khan COVID-19 hri a kai tih hriat a ni. Nimin chawhnu dar 1:30 khan Zoramnghingi (50), Maubawk chu COVID-19 Pneumonia vanga boral lehin nimin vek chawhnu dar 3:00 khan Thatinkipi (49), Chhinga Veng chu a boral ve leh bawk a, heng mite hi Kal thalo nei sa an ni bawk.

Heti hian Mizoram-a COVID-19 hri kai hmuhchhuah zingah nunna chan mi 33 zet an awm ta a, heng zinga 18 te chu tun thla chhunga boral an ni.

Comments

Chhiar Hlawhte