Mizoram-ah hri kai 173 hmuh belh leh an ni

Niminpiah khan Mizoram-ah Sample 3558 enfiah leh niin heng atang hian COVID-19 hri kai mi 173 hmuh an ni a, tualchhung a hri in kaichhawng an awm leh nual a ni.

Niminpiah khan ZMC Laboratory-ah Sample 1245 enfiah niin heng atang hian COVID-19 hri kai mi 85 zet hmuh an ni a, a tam zawk te hi tunhnaia State pawn atanga rawn haw inkhunghrang lai leh hri kai nen inkawmhnaihna neih avanga inkhunghrang te an ni a, anni bakah hian damdawi In-a damlo awmpuitu mi pahnih te pawhin hri an kai tih hmuhchhuah niin midang pakhat chu fimkhur thil a sample a enfiah ah hri a kai tih hmuhchhuah a ni bawk.

Niminpiah khan District hrang hranga TrueNat Laboratory-ah Sample 145 enfiah niin heng atang hian COVID-19 hri kai mi 12 hmuh an ni bawk a, an zinga mi 9 te chu Khawzawl District-a hri kai hmuh te niin 2nd IR Bn. mi leh sa, tunhnaia State dang inthlanna a duty te an ni a, Champhai District-ah hri kai mi 2 leh Saitual District-ah hri kai pakhat hmuh niin tunhnaia State pawn atanga rawn haw an ni bawk.

Rapid Antigen Test hmangin niminpiah khan Sample 2168 enfiah niin hri kai mi 76 hmuh an ni bawk a, an zinga mi 57 te chu Aizawl District-a hri kai hmuhchhuah niin Lengpui Airport Screening Point atangin hri kai mi 5 hmuh an ni a. Midang 52 te hi Aizawl District chhung hmun dang a hri kai hmuh niin an zinga mi 30 te chu hri kaina hriatloh leh chhui ngai a ni. Heng bakah hian Lunglei District-ah hri kai mi 8 hmuh niin Saitual District-ah hri kai 4 hmuh an ni bawk a, Siaha District-ah mi 3 leh Mamit District-ah hri kai mi 2 hmuh niin Kolasib District leh Lawngtlai District-ah hri kai pakhat ve ve hmuh an ni bawk.

Nimin khan Mizoram-a COVID-19 hri kai mi 82 te chu hri lakah fihlimin anmahni enkawlna hmun atanga chhuahtir an ni ve leh a, heti hian nimin tlai dar 5:00 thleng khan Mizoram-a hri kai hmuh tawh chu 7795 niin an zinga 6002 te chu enkawl dam an ni tawh a, hei hi hri kai hmuhchhuah atangin zaa 76.99 niin tunah hian hri kai enkawllai 1771 an la awm mek a, hri kai zingah nunna chan mi 22 an awm tawh bawk a ni.

Minister in COVID-19 hri kai leh :

Mizoram sawrkar-a P&E Department changtu Minister, R. Lalzirliana chuan COVID-19 hri a kai tih nimin khan hmuhchhuah a ni a, a rual hian a nupui pawhin hri a kai tih hmuhchhuah a ni bawk. Hemi hmalam hian Deputy Chief Minister, Tawnluia chuan COVID-19 hri a kai tih hmuh a lo ni tawh bawk a, a nupui leh a chhungte ah hri kai hmuh an ni bawk a ni. Heng Minister COVID-19 hri kai hmuhchhuah leh an chhungte hi sawrkar Dan in a phal angin Home Isolation-a enkawlna pek an ni bawk.