Mipui in Serchhip bial mipui hniak an zui ngei ring

ZPM President mawhphurhna la mektu K. Sapdanga chuan rampum mipui ten Serchhip bial mipuite hniak-ah kan zui ngei a rin thu a sawi.

Nimin-a Lalduhoma ZPM MLA atana lakluh a nih hnuah ZPM Vice President leh President mawhphurhna la mektu K. Sapdanga chuan an hotupa chunga thil thleng chu tawrh a ngaih lai kha chuan a rit hle a, a hautak hle bawk tih sawiin, “Duhthlan tur awm mah se, thlan ngaihna a vang hle. Kan hotupa thlavang hauh tura Law Court thlang lova Mipui Court kan thlang hi kan fin vang a ni lova, Pathian remruat a nih ngei kan ring,” a ti.

K. Sapdanga chuan “Mizoram politics hi lalna leh thuneihna inchuha inbeihna, hmanraw chhe ber pawh hman a thian vekna ni maiin kan ngai thin a, chu ngaihdan chu mipuite hian an hnawl ngam tawh tih tun bye-election result-ah hian a rawn inpuang ta niin kan hria. ‘Kan pawl candidate a nih chuan Utawk pawh...’ tih ngaihdan kha kan kalpel mek a, politics a nih vanga Sakhua hial pawh bosal a, khingpuite tihchhiat vek duhna ang chi kha mipuiin kan hnawl ta a, therhlo aiah dikna kan thlang tawh tih zirlai bung thar kan kai ta a, Serchhip bial mipuite hi zirtirtu hmahruaiah an tang ta a ni berah kan ngai a, ram pum mipuiten an hniakah kan zui ngei ang tih kan ring,” a ti bawk.