Latest News

May 31, 2021 thleng atan Mizoram-ah Total Lockdown kalpui chhunzawm a ni dawn

Mizoram-a COVID-19 hri leng avanga Lockdown kalpui mek tukin dar 4:00-a tawp tur chu Mizoram-ah COVID-19 hri kai thar chak taka an pun zel avang leh a vei mek thahnem tak an awm zui zel avangin tun thla ni 31 (Thawhtanni) zing dar 4:00 thleng kalpui chhunzawm leh a ni dawn.

Tun thla ni 31 thleng-a Mizoram-a Total Lockdown kalpui chhunzawm tur atan hian Mizoram sawrkar chuan inkaihhruaina thar siamin Inrinni khan tihchhuah a ni a, hetah hian inkaihhruaina awmsa thenkhat chu tih danglam niin a tam zawkah erawh chuan inkaihhruaina awmsa chu la kalpui chhunzawm a ni dawn a. Inkaihhruaina thar ah hian Mizoram a awmsa emaw, tharchhuah, eizawnna leh hmasawnna hnathawhna atana mamawh bungrua te chu Mizoram chhungah sem emaw, lakkhawm emaw phal a ni dawn a. Bungraw phurtute erawh chuan an awmna LLTF/VLTF te lehkha an la tur a ni thung a, lehkha-ah chuan an kal tanna Veng/khua leh thlenna tur hmun chiang takin a intarlang tur a nih bakah heng bungraw phurtute hi hmun danga kalkual emaw, kar kawng khuaah an chawlh phal a ni lo thung.

Courier Service, e-Commerce leh Home Delivery te chuan State pawn leh chhunga dawrkaite bungrua online emaw, Phone emaw hmanga order lawk sa te an pekchhuah phal a ni tawh dawn a, Thawhlehni leh Zirtawpni-ah te zing dar 5:00 atanga tlai dar 5:00 thleng chauh delivery phal a ni thung a, bungrua deliver-tute chuan Inchhung-ah lut lovin an thil sem te chu an pe tur a ni. MGNREGA hnuaia hnathawktu pawh inhnaih lovin, Covid-19 Appropriate Behaviour (CAB) kaihhruaina uluk taka zawmin hna an thawk tur a ni ang.

Inkaihhruaina thar-ah hian Dawr hrang hrang - thlaichi leh tiak leh Agriculture kaihhnawih bungraw zawrhna, hmasawnna peng hrang hrang thawhna atana bungraw mamawh - Iron Rod, Balu leh a dangte zawrhna, bungraw phur lirthei mamawh lirthei part zawrhna leh siamna hmun te chu dawr hawn theih sa bakah hawn phalsak an ni a, Thawhlehni zing dar 5:00 atanga tlai dar 5:00-ah an hawng thei dawn a ni. AMC pawn, District khawpui hrang hrangah chuan heng dawr bak hawn ngai a awm chuan Bawrhsap te ruahmanna a hawn theih a ni bawk ang.

AMC huamchhung leh District khawpui ah chuan hmasawnna hnathawh hrang hrang leh chhiatna thleng thei laka invenna thawh tul zual a awm chuan Bawrhsap leh VLTF emaw, LLTF emaw ten, a hmuna enfiahin hnathawh phalsak theih an ni dawn a, AMC pawnah chuan khuahkhirhna engmah awm lovin Lo leh huan-a hnathawh phal a ni tawh bawk. Mahni In-a thilsiamna hmun, Workshop, Bakery, Puanthui leh a dangte chu pawnlam mi chhawr lovin VLTF/LLTF te hriatpuina in an thawk thei dawn bawk a ni.

Inkaihhruaina awmsa anga kalpui tur zingah zirna In leh Sakhaw biakna hmun te chu khar zui zel a ni anga, vantlang hmun leh intawllenna te chu lak khar chhunzawm tur ni bawkin Inneih leh Reception bakah mitthi vuina ah mi 30 aia tam pun-khawm phal a ni lova. Mipui punkhawmna dang te pawh huaihawt phal ala ni lo bawk.

Mahni khua chhuahsana zin pawh a hma lama kaihhruaina angin khap ala ni a, eizawnna leh tul bik thil ni lo ah chuan veivah leh inlenpawh khap ala ni a, Mizoram sawrkar hnuaia Office zawng zawngte pawh la khar chhunzawm zel tur a ni ang.

He Order-a inkhuahkhirhna tarlan te kalh zawng emaw, ti nep zawngin Deputy Commissioner/District Disaster Management Authority (DDMA) ten inkhuahkhirhna an siam tur a ni lova. Amaherawhchu he Order-a tarlan bak anmahni District huamchhung atan a tul dan azirin, uluk taka an District dinhmun zirchian hnuah inkhuahkhirhna/inkaihhruaina an siam belh thei thung ang.

Comments

Chhiar Hlawhte