Khum leh ICU tam zawk dah

Health Minister Dr. R. Lalthangliana chuan hripui thawh hnihna thleng mekah ZMC-ah Khum tam zawk leh ICU siam belh a ni, a ti.

Hripui leng mek chungchanga nimin-a mipuite hnena thuchah a tihchhuah ah Health Minister chuan hmanhmawh thila ICU-a siam nghal theih tur hi nikum lamah khan khum 21 an ruahman a, thawh hnihna atana an lo inbuatsaih lawkna ah ICU 13 an siam belh leh bawk a. Khum an indaih tawh loh avangin ZMC-ah hian Ward thar an hawng dawn tih sawiin, Vawiin lam atang chuan damlo an indahlut thei tawhin a rinawm tih a sawi a. Ward thar hawn a nih hunah chuan khum 300 chuang a awm thei tawh dawn a, Ward thar pawh hi ICU anga hman nghal theih turin Oxygen pekna a thlunzawm vek a nih thu a sawi bawk.

ZMC chu COVID-19 hri kaite zingah pawh a ngaihtuahawm zualte enkawlna hmun atan ruahman a nih thu Health Minister chuan sawiin, ICU leh Casualty chhiar tel lovin khum 300 a awm a, COVID-19 hri chu inkaichhawn awlsam tak a nih avangin damlo te khum inkar-hlat deuh hleka rem a ngai niin a sawi a. Hripui thawh hnihna-ah hian khum 246 an dah a, hei hi tunah chuan an luah khat vek tih a sawi bawk.

Oxygen mamawhna pawh a nasa zual sawt hle tih sawiin Health Minister chuan, ZMC a Oxygen siamchhuahna khawl thar 200 LPM pawh tunkar liamta khan bunfel a nih thu leh heti chung hian mamawh belh dawna an inhriat avangin hmanhmawh taka Oxygen siamchhuahna khawl dang pahnih siamna tur hmun laih mek a ni tih a sawi a. State sawrkar hmalakna in cheng nuai 47 man hu 1000 LPM plant dah tum a nih thu a sawi a. ZMC-ah hian nitin Oxygen bur lian hi 100 leh 240 inkar hman ziah a nih thu leh pakhat thun khahna man hi Rs. 360 zel niin hei aia tam hman ala ngaih hun a thleng lovang tih pawh sawi theih a nih loh thu a sawi bawk.