Serchhip District-ah COVID-19 hluar zelin hri kai 527 zet hmuhchhuah an ni tawh

Serchhip District-ah COVID-19 hri kai hmuhchhuah an awm belh zel a, nimin thleng khan hri kai 527 zet hmuhchhuah awm tawhin nimin leh niminpiah ah hri kai hmuhchhuah thahnem tak an awm leh a ni.

Niminpiah khan Serchhip District-a hri kai mi 14 hmuhchhuah niin an zinga mi 13 te hi Rapid Antigen Test hmanga Sample enfiah 150 atanga hmuhchhuah an ni a, mi 11 te chu Chhingchhip khua a hri kai hmuhchhuah niin mi 10 te chu khawtual mi, hri kai tawh nen inkawmhnaihna nei an ni a, midang pakhat hi KRAM Infracon Pvt. Ltd. hnuaia thawk a ni thung. Niminpiah khan Keitum-ah hri kai mi pakhat, hri kai tawh nen inkawmhnaihna nei hmuhchhuah a ni a, Thenzawl-a Horticulture College sa tu Tribeni company hnuaia thawk tura State pawn atanga rawn lut chuan hri a kai tih hmuh a ni bawk. Nimin vek khan Serchhip-a TrueNat Laboratory-ah Sample Sample 2 enfiah niin hri kai pakhat hmuh a ni bawk a, Serchhip-a Assam Rifles mi leh sa, mahni inrinhlelhna neih avanga Sample enfiah niin hri kaina chhui ngai a ni.

Nimin khan Serchhip District-a khaw pali-ah hri kai mi 20 zet hmuhchhuah an awm leh bawk a. Keitum khua ah tunkar Thawhlehni-a hri kai hmuhchhuah tawh chhuina kal zelah nimin khan hri kai mi 8 hmuh belh leh niin heti hian Keitum khua ah hian tun thlengin hri kai mi 12 hmuh an ni tawh a. Hun engemaw chen hri kai hmuhchhuah an awmloh hnuah Thenzawl-ah pawh nimin khan hri kai mi 5 hmuhchhuah niin heng mi te lo kawmhnaih chhuizuina ah hri kai 3 hmuh belh niin Thenzawl-ah  hian nimin khan hri kai mi 8 hmuh an ni a. Chhingchhip khua ah nimin khan hri kai mi 3 hmuh niin heng mite hi Company hnuaia hna thawk tura rawn lut an ni thung a. Chhingchhip ah hian tualchhung mi hri kai 47 hmuhchhuah ni tawhin an zinga 13 chu enkawl dam an ni tawh a ni. Nimin khan Serchhip Chanmari Veng-a hri kai hmuhchhuah tawh te lo kawmhnaih te zingah hri kai mi pakhat hmuh belh leh niin In lama inkhunghrang lai a ni thung.

Nimin khan Serchhip District-a hri kai enkawl mi 21 te chu anmahni enkawlna hmun atanga chhuahtir an ni ve leh bawk a, heng hri kai enkawl dam tak te hi Nursing School CCC atangin Chhingchhip leh Serchhip mi 4, PTS Thenzawl atangin mi 3 leh Home Isolation mi 14 an ni a, tunhnaia Serchhip Chanmari Veng-a hri kai hmuhchhuah mi 18 te Sample ennawn ah mi 16 te chu hri lakah fihlimin chhuahtir zingah hian an tel a ni.

Heti hian nizan dar 10:00 thleng khan Serchhip District-a hri kai hmuhchhuah chu 527 ni tawhin an zinga mi 438 te chu enkawl dam an ni tawh a, hri kai enkawllai mi 88 la awmin hri kai zingah hian nunna chan mi pakhat a awm tawh bawk a ni.