Serchhip Chanmari Veng ah hri kai 18 hmuh an ni

Nimin khan Serchhip Chanmari Veng-ah COVID-19 hri kai mi 18 zet hmuhchhuah an ni a, heng mite hi hri an kaina hriatloh leh chhui zui ngai an ni.

Serchhip Chanmari Veng atanga thu kan dawn danin Serchhip Chanmari Veng-a mi pakhat chu damlohna avangin nimin khan Ser-chhip damdawi In-ah inentir turin an kal a, hei hi Rapid Antigen Test hmanga lo enfiah niin hri a kai tih hi hmuhchhuah a ni a, a kalpuitu a nu leh pa te sample enfiah nghal niin anni pawh hian hri an kai tih hmuhchhuah nghal a ni a, a chenpui midang 4 te pawh an Sample enfiah niin hri an kai vek tih hmuhchhuah a ni a, In lama inenkawl tura tih an ni.

Hetianga hri kai hmuhchhuah te hri kaina hi chhui zui nghal niin hri kai pakhat hmuh belh leh a ni a, heng mi ten an lo kawm hnaih tawh te chu an Sample enfiah sak chhunzawm nghal niin nimin tlai dar 6:00 thlenga Sample enfiah ah hri kai mi 18 zet hmuhchhuah an ni ta a ni. Nimin a Chanmari Veng-a hri kai hmuhchhuah mi 18 zinga mi 10 te hi mipa niin midang 8 te hi hmeichhia an ni a, chhungkaw hrang 9 ami nia hriat an ni bawk.