Hri kai lanchhuahna nei an tam telh telh avangin hri kai enkawlna ah harsatna a siam tan

Health Minister Dr. R. Lalthangliana chuan Mizoram-ah a ni telin COVID-19 positive kan pung telh telh tih sawiin, taksa-a hri kai lanchhuahna nei a hma aiin an tam telh telh bawk avangin hripui veite enkawl kawngah a bikin harsatna a siam tan tih a sawi.

Nimin khan Health Minister Dr. R. Lalthangliana ho hian Aizawl-a SAD Conference Hall-ah COVID-19 hri kai te enkawl dan leh thil pawimawh chi hrang hrang sawihona neih niin he hunah hian Specialist Doctor te, Doctor pension tawh leh thawklai bakah sawrkar mi pawimawh te an tel a, he hunah hian Health Minister chuan Mizoram-ah a ni telin COVID-19 hri kai kan pung telh telh tih sawiin, chu mai ni lovin symptom nei a hma aiin an tam telh telh bawk hian hripui veite enkawl kawngah a bikin harsatna a siam tan tih a sawi a, damlo enkawl dan turah ngaihtuahna uluk taka sen a tul thu leh kum hmasa aiin nasa takin kan tan tlan a ngaih thu a sawi a. Sawrkar Doctor leh Nurse bakah Medical Workers te dinhmun en hian kan indaihlohna a nasa lehzual ta tih pawh sawiin, “A thlaphanthlak deuh tak avangin theihtawp chhuaha kan tan tlan a ngai a ni,” a ti a. Private Hospital leh Doctor te bakah Doctor pension tawh ten thahnemngai taka theihtawp chhuahpui an inhuam avang erawh chuan an hlauthawng lo tih sawiin, an inhuamna ah lawmthu a sawi bawk.

He thutkhawm ah hian COVID-19 hrik thahna damdawi bik hmuhchhuah a la nih loh avangin mipuite tan damdawi lo ei ve leh lo inenkawl danah fimkhur a tulna laite inzirtir a tul thu sawilan niin, a tul anga rang taka hmalak tha tih a ni a. Tunhnaia COVID-19 hri kai hmuhchhuah thar zinga kum 60 chunglam an tlem tak thu leh thalaite leh naupang zingah COVID-19 hrik ai an pung chak sawt ta hle tih sawi a ni a, naupang kum 10 hnuai lam hri kai an pung chuan chhungkua ah a hma aiin kan inkaidarh nasa hle tih a tilang nia an hriat thu sawi a ni bawk. Doctor chuan tuna hri kai kan pun dan en in engemawchen chu a lo berah nitin CCC/CCCC-a damlo 400 vel dahluh belh reng tura in hisap a ngai nia an hriat thu an sawi bawk.

He hunah hian Doctor te chuan COVID-19 hrik hnathawh dan sawiin, a tlanglawn berah chuan Chuap a khawih nasa in Chuap a ti vung a, Chuap a chhiat chuan Pneumonia an vei a awlsam avangin a hlauhawm hle a ni, an ti a. Hei bakah hian COVID-19 hian Lung a khawih nasa a, thisen a tih khal theih avangin Thisen Zam pahnih, Artery leh Vein te a block duh avangin Heart Attack leh Stroke a thlen thei a ni, an ti a, Lungphu a tihran avangin Lungphu thalo a thlen thei a ni tih an lo tawnhriat tawh thu an sawi bawk.

COVID-19 hri kaite tan Oxygen tlak-chham a hlauhawm thu sawi niin, Oxygen tlakchham hian nasa takin taksa a nghawng a, Lung, Kal leh Thluak a tichhe thei a, hei hi ven reng a tul an ti a, eng damdawi mah hi ‘A tha ber e’ tih sawi tur a awm rihloh avangin damlote mamawh ang tawk Oxygen lakkhawl reng a tul thu sawi a ni bawk.

Hri kan inkaidarh nasat chhan ber nia lang chu Mask vuah thatloh leh Social Distancing kan vawnthat loh vang nia a lan thu Doctor te hian an sawi a, thalaite zinga Oxygen Level (SPO2) hniam thut an tam a, an taksa a hrisel that avangin rei tak harsatna awm lovin an awm thei a, mahse a rawn lan chhuah meuh chuan a lo pawi viau hman thin a ni, an ti a. A theih hram chuan mahni inchik reng a, Pulse Oxymeter hmang emaw a in enfiah reng thaa an hriat thu an sawi bawk.

He hunah hian Zoram Medical College-ah ICU khum 7 leh SICU Khum 6 a awm thu leh ICU anga hman theih tura ruahman Khum 15 awm theihna a awm thu tarlan niin, reilote ah khum 65 awm theihna tur an peihfel thu tarlan a ni a, COVID-19 Helpline/Control Room chu District Hqrs. tinah ruahman a pawimawh thu tarlan a ni bawk.