Health Minister in COVID-19 hri kai damlote enkawlna tur hmun a ngaihtuah belh zel

Health Minister, Dr. R. Lalthangliana chuan COVID-19 hri leng mekah lungruala inpum-khatna leh tawngtaina nena kan beih chuan kan ram hian chhiatna rapthlak lutuk tawng lovin kan him thei ang, a ti.

COVID-19 hri kai thar an pun zel avangin nimin khan Health Minister, Dr. R. Lalthangliana chuan Covid veite enkawlna hmun tur dap kual zelin, MINECO-a Mizoram Rural Bank, Head Office sak thar chu Covid Care Centre (CCC) emaw, Community Covid Care Centre (CCCC) atan a en a, he building hi Floor 7-a sang niin, inthiarna, tui leh electric lam pawh duhthusamin a nuam a, Health Minister chuan Covid veite enkawl nan lak ngei a duh thu a sawi a. Tuikual South-a Agriculture Directorate building pawh en nghalin, he building hi chu a hlui tawh em avangin mihring chenna atan a tlakloh ah ngaih a ni.

Health Minister chuan COVID-19 hi Mizoram-ah Aizawl khawpui chu a hluarna ber anih avangin CCC emaw, CCCC emaw dap belh zel anih thu leh Medical Team thlengin ngaihtuah belh zel an ngaih thu a sawi a, MKHC-te nen pawh an indawr zel thu leh damlo serious bik tan Oxygen leh Ventilator-ah tan an la zel bawk tih sawiin, “Kan Chief Minister pawhin kawng tinrengah hriatthiamna sang tak a nei zel a, kan mamawh kan thlente chu min pawmsak zel a, kan lawm hle a ni,” a ti a. CM Relief Fund-ah mimal leh pawlho an lo pen chhuak zel tih pawh sawiin, “Mizo nun 'thian chhan thih ngam' kan nihna a lo lang zel a ni. Kan thawhho thatna hi Pathian in mal min sawm ngei ngei ang tih ka ring tlat a ni. Lungruala inpumkhatna leh tawngtaina nena kan beih chuan kan ram hian chhiatna rapthlak lutuk tawng lovin kan him thei ang,” a ti bawk.

Health Minister chuan nikum lam aiin COVID do hmalaknaah nasa taka tan kan lak a ngai tih pawh sawiin, “A tul tawpkhawk loah chuan tumah zinchhuak lo ila, ram pawnah phei chuan i zin rih lo tawp ang u. January to March chho vel khan kan lo inthlahdah hman a, inkhawmte kan phal a, puanven i sawichhing ang u,” a ti a. Tunah hian Kanhmun, Vairengte, Myanmar nen kan inrina hrang hrang, Manipur ramri thlengin theihtawp chhuahin kan inveng uluk hle tih sawiin, “Kan Police leh Task Force-te hmalakna pawh chhuanawm ka ti takzet a ni,” a ti bawk.