Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

District Hospital kalpui dan tih danglam hlek a ni

COVID-19 hri leng hluar leh mek avangin Serchhip District Hospital-a damlo inentir dan leh damlo tlawh leh awmpui dan kaihhruaina siam thar a ni.

Serchhip District Medical Superintendent chuan COVID-19 hri alo darh chak zel avangin mipui him zawk nan Vawiin, May 3, 2021 aTanga hman turin Hospital kalpui dan tur hi a tichhuak a. Hemi ang hian OPD-a inentir tur te chu hming ziah hmain Gate-ah screening neih tur a ni a, Covid-19 symptoms nei a ngaih te chu Rapid Antigen Test neih tir nghal an ni ang. Hming ziak tura intlar laiin rin bial (Marking) ah zel din tur a ni dawn a, kum upa (kum 70 chunglam) chak lo leh na zual deuh te en hmasak thin an ni ang.

Hei bakah hian Hospital-a damlo admit tur zawng zawngte Covid-19 Test (Rapid Antigen Test emaw, TrueNat Test emaw neih vek tur a ni a, OPD leh Casualty aTanga damlo admit tur te chu a admit tu doctor in test dan tur a ngaihtuah sak ang. Damlo na zual bik leh nau nei mai tur te chu, Ward-ah sample lak tur a ni anga, anmahni enkawlna tih khawtlai tur a ni lo thung. Emergency nilo zai tur te chuan ni hnih (2) aia reilo COVID Negative result an nei tur a ni a, Minor Operation (Inzai tenau), Endoscope, Dental Procedure (Ha phawi, Ha hnawh)-a damlo admit ngailo ah pawh ni 2 aia reilo COVID Negative Result neih tho tur a ni.

Hospital-ah mi pakhat bakin damlo awm-pui phal a ni dawn lova, Damlo awmpuitu tur ten nihnih (2) aia reilo Covid-19 Negative Result neih vek tur a ni. Damlo awmpuitute inthlak phal a ni lova, loh theihlohah chuan Ward Incharge (Doctor leh Nurse) bulah dil tur a ni anga, a thlaktu tur pawh Rapid Antigen Test neih tho tur a ni. Damlo chaw pe tur ten Gate-ah in hlan chhawn tur a ni tawh anga. Damlo awmpuitu ten damlo dang kan leh tlawh kual phal a ni lo bawk a, Damlo boral an awm palhin damdawi In chhungah mi panga (5) aia tam luh phal a ni lo bawk ang.

Comments

Chhiar Hlawhte