Serchhip bial mipui hnehna a ni - Lalduhoma

Serchhip bial MLA bye-election neih zawh taka Zoram People's Movement (ZPM) Candidate thlantlin tak Lalduhoma chuan, hnehna an chang chu bial mipuite hnehna a ni tih sawiin, “Keima mimal hnehna a ni lo,” a ti.

Nimin-a thlantlin a nih hnuah amah kawmthu thuthar thehdarhtute hnenah Lalduhoma chuan bye-election chu Ruling party ta anga ngaih a nih laia Opposition an chak chu thil mak a nih thu sawiin, “Pathian hian kan party leh keimah min chawisan a duh a, chumi atana Pathian remruat leh a ruatlawk thil lo thleng niin ka hria,” a ti a. MLA aTanga ban a nih hnuah Serchhip bial mi 2019-te ngaihdan an lak hnuah Mipui Court-a kal zawk tura thutlukna an siam hnuah Serchhip mipuite'n thiam an chantir ta tih a sawi bawk.

Ruling Party lamin thutiam an neih te chu bawhzui a tum thu sawiin Lalduhoma chuan, “Education Certificate Xerox copy thehlut zawng zawngte ka hnenah rawn in report se ka duh a. Master Roll leh Transfer an tiam te, Housing Loan leh nuai 3 sem bakah Police ringawt pawh Battalion khat hen vel an tiamte kan hria a, chuvang chuan Ruling lamin min tiamkam a nih avangin kan bawhzui ang,” a ti a, “He bye-election hi kan Thatpui nasa hle dawn a. Pathian leh mihring hmaa an thutiam a nih avangin kan sawrkar pawhin min tihhlawhtlin sak turah kan ngai a ni,” a ti bawk.