Lockdown inkaihhruaina ti danglamin khauh zawkin inkaihhruaina siam thar a ni

COVID-19 hri leng avanga Mizoram-a Lockdown kalpui mek-a kaihhruaina thenkhat chu tih danglam hret niin a hma aia khauh zawkin inkhuahkhirhna hi kalpui a ni a. Phalna neia kalpui theih dawr leh Service Center te chu Inrinni-ah chiah hawn theih niin nidang-ah hawn phal a ni lovang.

Tun thla ni 11 thleng awh tur he inkaihhruaina tih danglam tarlan zingah Mizoram-a lo lut turte chu mPass-ah an in-register ngei tur a ni a. Entry Points te leh Mizoram rawn luh theihna hmundangah te chuan uluk takin Deputy Commissioner leh Superintendent of Police te ruahmanna angin Police leh VLTF te an duty ang. Zin veivah chungchangah mahni khawchhung leh District chhunga tul bik thila zin veivak te chuan an chhuah tanna Veng VLTF leh LLTF te hriatpuina lehkha an keng tur a ni a, tul bik thila District pawn lama zinchhuah ngai te chuan an awm mekna Deputy Commissioner emaw, SDO (Civil) emaw, BDO emaw hnen atangin phalna an la hmasa tur a ni.

Phalna neia dawr hawnte chu tlai dar 4:00-ah khar vek tur a ni a, phalna neia kalpui theih dawr leh Service Center te chu LLTF leh VLTF te hriatpuina leh SoP zawm chungin Inrinni-ah zing dar 10:00 atanga chawhnu dar 2:00 thleng hawn theih a ni anga, heng ni leh darkar bakah hi chuan hawn phal a ni lo. Dawr hawn hun chhung hian tum khata mi tam tak an punkhawm loh nan inchhawka dawr kal dan tur LLTF/VLTF ten an ruahman ang. Inrinni zing dar 5:00 atanga zing dar 10:00 thleng sa leh thlai zawrh theih a ni anga. A zawrhna hmun tur remchang chu LLTF leh VLTF ten an ruahman anga, mipui pungkhawm tamlo tur leh Social Distancing kalpui turin ruahmanna an siam ang.

Sawrkar Pisa kai chungchangah Secretary/Head of Department/Head of Office ten hna tul zual thawk turin mi tlem thei ang ber Office kal tur an ruat anga, Detailment Order an siam chu DM&R Department leh Deputy Commissioner te hnenah a copy an pe tur a ni. Office kal turte chuan anmahni ruatna Detailment Order chu Police emaw, COVID-19 Executive Duty te enfiah turin an keng ngei ngei tur a ni a, Office-a kal tur ni lo leh COVID-19 Duty-a tello te chuan anmahni In atangin Office hna an thawk ang. Sawrkar hnathawk leh sawrkar sum atanga hlawh la te chu COVID-19 duty turin a tulna apiangah hman an ni anga. Hetianga duty tura ruat te hi an duty-na hmun turah zing dar 9:30 hmain an thleng tur a ni.

Mi panga aia tam lo thawhna mahni In-a heng - Carpentry Workshop, Steel Fabrication Workshop, Bakery, Tailoring, Weaving leh hetiang lam thilah te chuan VLTF/LLTF te hriatpuina in hna thawh phal a ni a, Veng dang atanga hnathawktu lakluh phal a ni lo. Hnathawh hrang hrang - Retaining Wall/Drain/Kawng siam, Building sak/repair/thiah, kawng laih, Lei dawh te leh chutiang kawnga hmalakna – Fur hmaa thawh zawh ngei ngai leh chhiatna thleng thei ven nana thawh hmanhmawh ngaite chu VLTF/LLTF te hriatpuina in thawh chhunzawm phal a ni a, ramchhunga awm sa Labour te chauh ruai a thawh tur a ni.

Lo neitu leh huan neitute, ranvulhtu te, Sangha Dil neitu te leh a thawktute chu phalna hranpa lak ngai lovin an hna thawh phalsak niin hna thawk tura ram riah pawh phal a ni. Hmun khata mi 5 aia tam awmkhawm erawh khap a ni. Lo leh huan-a kal leh feh turte chuan zing dar 9:30 hmain khaw chhung (City/Town area) an chhuahsan hman tur a ni a, Police/COVID-19 Executive Duty-te enfiah theih turin VLTF/LLTF te phalna lehkha emaw, an kalna tur lo leh huan an nei ngei a ni tih lantirna document (LSC, periodic patta, adt.) an keng ur a ni. Quarry-a lung lak, block/brick siam, rawra her leh chhut leh thingzai khawl-a thing zai theih a ni anga, an hnathawhna hmunah zing dar 9:30 hmain an thleng tur a ni a, khawpui chhungah zing dar 9:30 leh tlai dar 4:00 inkarah an veivah phal a ni lo thung.