Latest News

Chanchin thar thenkhat :

MLA la lalut thei rihlo

Serchhip bialtu MLA atana thlan thar Lalduhoma chu nimin-ah MLA atan lakluh tura rua-hman ni mah se hri leng avangin thulh rih a ni. Serchhip bial MLA bye-election neih zawh tâka thlantlin ZPM Candidate Lalduhoma hi nimin khan Member of Legislative Assembly (MLA) atana lakluh tum ni mah se, hri leng mek avanga inkhuahkhirhna khauh zawk siam a nih avangin tiamchin awm lova sawn a ni a. Assembly Speaker Lalrinliana Sailo chuan, “Thawhtanni zan-ah inkhuahkhirhna khauh zawk siam a nih leh tâk si avangin kan thulh rih. Hetiang a nih laia pun-khawmna lam thil lo buatsaih chu tih chi-ah kan ngai lo,” a ti a; remchang hmasa berah lakluh inkhawm buatsaih a nih tur thu a sawi bawk. Thudawnna pakhat chuan May 11, 2021 khian MLA thar lakluhna hi nei turin ruahmanna siam a nih thu a sawi bawk.


Sawrkar in SIT din

Tunhnaia Mizoram hmun hrang hranga kang-mei chhuak chhui chiang tur leh hemi kaihhnawiha dan dinglai awm mek te zirchiang a, a tul anga hmalak dan tur rawtna siam turin State Level Special Investigation Team (SIT) chu din a ni a, SIT-ah hian Chief Conservator of Forests (Administration), RS. Sinha chu Chairman niin Member 3 ruat an ni a, kangmei chhuah chhan, hemi kaihhnawih a dan hman mek te leh kangmei in thil a tihchhiat chungchang te chipchiar takin an zirchiang dawn a. Notification chhuah ni atanga chhiara thla hnih ( 2 months) chhungin sawrkar ah rawtna an thehlut dawn a ni.


Kaihhruaina ti danglam hret

Mizoram sawrkar chuan hri leng avanga inkhuahkhirhna thenkhat ti danglamin hemi ang hian Inrinni zing dar 5:00 atanga chawhnu dar 2:00 thleng sa leh thlai zawrh theih a ni anga, phalna nei a dawr hawn te dar 4:00-a khar vek tur tih chu paihin Inrinni-a chawhmeh leh chakkhai lam hun siam chhunga harsatna bik neite tan LLTF/VLTF ten ruahmanna an siampui thei bawk ang.


ZPM in thupek sut an phut

ZPM Thalaite chuan Mizoram sawrkârin May 4, 2021-a Oxygen leh Ventilator hman man sâng taka lak a nihna tur thuchhuah a siam chu mak an tih thu leh a rang thei ang bera he thupêk hi sut leh thuai tur leh a mamawh apiangte hnena a thlawna Oxygen leh Ventilator pe turin Mizoram sawrkâr an phut thu thuchhuah siamin an tarlang a, ZMC-a Oxygen siamna khawl hman lohva awm reng chu hman theih tura buatsaih nghàl turin Mizoram sawrkâr an phut thu an sawi bawk.

Hetihlai hian ZMC-a Oxygen hman man chungchanga May 4-a Medical Superintendent thuchhuah chu ngaihtuah lai a nih avangin hman rihloh tura tih a nih thu sawrkar chuan a sawi bawk.


SEDP Board thiah phut

Congress Thalai, MPYCC chuan Hripui COVID-19 lêng mêkin nasa taka Mizoram a tuam tak avangin Mizoram Sawrkar dinhmun nasa takin a tlahniam ta tih thuchhuah siama tarlangin, tul lova sum khawhralna dang, Mizo-ram Sawrkar in SEDP Board 14 lai a siam te chu ráng taka thiat nghal tura an phut thu an tarlang a. SEDP Board 14-te chu tangkaina em em sawi tur awm lo, a hminga nihna sâng tak nei leh pawisa tam tak sen thlawnna nia sawiin, SEDP Board 14-te hian an inrélbawlna atana sum tam tak an hmanral bakah a thawkte hlawh ringawtah kum khatah cheng vbc. 2.6 chuang sen ral a nih thu an sawi bawk.

Comments

Chhiar Hlawhte