Serchhip District Road Protection Committee hmalakna hrang hrang thlirletna neih a ni

Serchhip District Road Protection Committee chu nimin khan thukhawmin an hmalakna an thlirlet bakah hmalak zel dan tur an sawiho.

He thutkhawm Serchhip DC Meeting Hall-a neih hi an Chairman, Serchhip District Bawrhsap, Kumar Abhishek chuan kaihruaiin nikum kum tawp lam atang khan Road Protection Squad te chuan khawpui chhung kawngpui-te a lo that a, a him zawkna atan Village Council Area zawng zawng fang chhuak vekin kawngpui an enkawl dan te an zirchian thu a sawi a. Hmalakna engemaw zat awm tawhin bawhzui ngai thilte pawh a awm thu sawiin, khawpui chhung paltlangtu National Highway chu tunlai hian siam that mek a ni a, dimdawi leh uluk taka enkawl a tul thu a sawi a, VC tinte pawh kawngpui enkawl kawnga hmalakpui atan a sawm nghal a ni.

He hunah hian Road Protection Committee in Veng hrang hrang tlawhkuala an thil hmuh te bawhzui a nih dan thlirletna neiin khawpui chhunga VC hrang hrang ten lirthei neitute tana lirthei dahna chungchanga hma an lak dan an tarlang a, VC thenkhat ten lirthei neitu ten Garage an neih vekna tura hma an lak bakah Parking Area an siam thu te an tarlang a. Hetihlai hian VC thenkhat chuan hmalakna an la neihloh thu sawiin, Bawrhsap chuan vantlang kawngpui kam-a lirthei dah chu a remloh avangin VCP te chu Parking area tur a theih anga lo ngaihtuah turin a chah a ni. Motor nei thar ten Registration an tih dawnah Garage an neih ngei a ngai tih he hunah hian tarlan niin VC te pawhin garage neilo te chu inhmaizah avanga nei anga ziah sak thin loh tur a nih thu tarlan a ni a, he hmalakna hi khauh taka kenkawh zui zel a tul thu pawh tarlan niin, Kawngsir-a lirthei dah chungchang ah District thuneitute atanga thupek tichhuakin kenkawh nise an ti bawk.

He hunah hian Vantlang kawngpui dal-a bungrua dahhnawk te senghawi tura hmalakna awm tawh bawhzui a nih dan VC hrang hrang ten tarlangin, hnathawk tur ten kawngsir-a bungrua chhawp an mamawh a nih pawhin VC te hriatpuina nen UD&PA Department-ah phalna an lak a tul thu tarlan a ni a. Kawngsir-a bungraw dah ten Side drain-a tuihawk luanna dal a dah a remloh thu pawh tarlan a nih bakah kawngpui tana hnawk lutuk tura dah a remloh thu tarlan a ni a. Kawngpui neka In sa te leh an LSC pawn lam nekte pawh VC ten Revenue Department ah thlenin a tul anga hmalak zel tura tih a ni bawk. Serchhip District Truck Owners Association hnen atanga Truck dinna tur hmun ngaihtuah sak tura ngenna awm chu Serchhip khua chhimlam leh hmarlam kawtchhuah-a VC ten ram ruak lo en se, a remchan anga cheibawl zui dan ngaihtuah nise tiin Village Council tinah Road Protection Squad din nise tiin, chu chuan anmahni huamchhung theuhah kawng humhalh leh venhim hna an thawk dawn a ni.