Peoples’ Conference (PC) Party in Serchhip bial bye-election chuh an tum

Peoples’ Conference (PC) Party chuan Serchhip bial-a Assembly bye-election lo awm tur chu chuh ngei an tum thu sawiin, an Candidate tur erawh sawi theih ala nih loh thu leh an la dap mek thu an sawi a. Serchhip-ah PC party mi leh sa pawh an la awm nual thu an sawi bawk.

Nimin-a Serchhip Press Club-a thuthar thehdarhtute an kawmna hunah PC Party Vice President, Lalrinzuala Chawngthu chuan he thu hi a sawi a, he hunah hian PC Party Vice President chuan Serchhip bial-a Assembly bye-election lo awm tur hi an Party chuan chuh ngei an tum thu leh hei hi Meeting-ah pawh an rel tawh thu a sawi a, amaherawh chu tunah hian Election Commission of India-ah Registration tifel tura hma an lak mek thu leh an la tihfel loh thu sawiin, hei vang hian Aizawl Municipal Corporation (AMC) inthlanna pawh an chuh theihloh phah thu a sawi a, an Party Registration hi tihfel thuai theih an beisei thu sawiin, Registration hi an tifel thei a nih chuan Serchhip bial-a bye-election hi PC Party anga an chuh dawn thu leh an tifel hman ta lo a nih erawh chuan ngaihtuahna thar an sen leh tur thu a sawi a. Thuthar thehdarhtute zawhna chhangin Candidate chungchang thu ah Serchhip leh Aizawl lam-ah an la inzawn mek thu sawiin, tihfel erawh an la neih loh thu a sawi bawk.

PRISM Party leh MPC Party te inzawm chhoh chungchang pawh sawiin Lalrinzuala Chawngthu chuan kum 2006 vel atangin PRISM chu NGO anga din a nih thu leh a tirah mi 3 velin an din a nih thu a sawi a. An hmalakna chu Kohhran te pawhin an thlawp thu leh Branch pawh sang khat dawn an din hman thu a sawi a, amaherawh chu an hmalakna hian rah tha tak tak chhuah mah se, a hlawhtlinna tak tak tur chuan thuneihna hmanga hmalak zui a nih loh chuan awmzia a neih loh thu leh hei vang hian kum 2017 atangin Party anga an din tak thu a sawi a. Party anga an din hnu hian MLA inthlan leh MP inthlan an hmachhawn thu pawh sawiin, amaherawh chu an dinhmun chu mitin hriat a nih thu a sawi a. Party hrang hrangte dinhmun leh kalphung te an zirchian hnuah MPC Party nen chuan inzawm mai chu tha an tih avangin nikum Oct. 6 khan an inzawm tak thu a sawi a. Brig. T. Sailo chuan Mizoram hmasawnna atan leh dinchhuahna atan ruahmanna neiin hma-thlir thui tak alo neih tawh thu leh heng hmalakna te hi tha an tih thu a sawi bawk.

Serchhip-ah pawh PC Party mi leh sa an la awm nual tih PC Party Vice President chuan a sawi a, an beisei aiin pawhchhuah tur pawh an la tam thu a sawi a, December thla khan Unit pahnih an din tawh thu sawiin, Party dang in an tih duh meuh loh, Party District Hqrs. function tir an tum thu a sawi a. Serchhip bial-a bye-election neih tur chu tlin ngei tuma chuh an tum tur thu pawh sawiin, kum 2023-a MLA inthlanpui lo awm turah hnehna chang lamah tel ngei an tum thu a sawi bawk a ni.

He hunah hian PRISM Party an nih laia an President leh tuna PC Party Sr. Vice President, Vanlalruata pawh telin an hmalakna hrang hrangte a sawi bawk a. Tun tum hi PC Party an nih hnua Aizawl khawpui pawn lama an zinchhuah tumkhatna a nih thu a sawi a. PRISM an in din tirh-a a bul tantute chu MPC Party nen an inzawm hian an tel thu leh Party dang-a kal chu tlemte an nih zawk thu a sawi bawk.