Bairabi Zophai-a buaina thleng in ziaawm lam pan

Bairabi Zophai leilet hmuna KV Line Survey tura kal Power & Electricity Department, Mizoram leh Bairabi khawthlang hruaitute chu Zophai leilet-a hnamdang awmte'n niminpiah tlai-a kut an lo thlak avangin buaina a chhuak a, nimin lam khan boruak erawh a ziaawm tawh nia thudawn a ni.

Thudawn danin, niminpiah chawhnu lam khan P&E Department mi leh sa leh Bairabi VC te hi Bairabi Zophai-ah hian kalin Assam lam hian Mizoram chhungah kawng an lo lai a, he an lei lai hi Bairabi VC Vice President chuan Phone hmangin thla a la a, helai hmuna lo awm hnamdang te chuan a thlalak hi tichhe tura tiin a tihchhiat duh loh avangin hnamdang te hian umzuiin kut an thlak zui ta a ni.

He thil thleng an hriat veleh Bairabi atangin thalai rual te chu Zophai-ah hian kal nghalin buaina a chhuak zui a, lung hmang-a in tawng in sawrkar lamin Police te pawh an tirlut nghal a, zan lamah helai vela Thlam 19 chu a kang a, heng te hi Assam sawrkar thuneitu ten an enfiah hnuah zangnadawmna pek an tum tih an sawi bawk.

Mizoram leh Assam ramri buaina kal zelah Assam State Hailakandi District chhunga awm, Gharmura-a Presbyterian Mission School Compound chu misual tutih hriat loh ten nizan hmasa khan hriamhrei nen luhchilhin, Headmaster H. Vanlaldika te chhungkua kut an thlak a. Thudawn danin Thawhlehni zan dar 8:30 bawr vel khan hnamdang misual 30 rual velin Presbyterian Mission School, Synod Mission Compound, Gharmura hi hriamhrei nen luhchilhin Quarters hmasa ber, chawkidar Lalramchuani (Evangelist) te chhungkaw awmna bitum hmasain an suasam a, chumi chu duhtawk lovin an Car (Alto 800) nen an halsak zui a ni.

Misual rualte hian Quarters an hal zawh hian Headmaster, H. Vanlaldika leh a chhungte chenna In lam chu chem leh hmanraw chi hrang hrang te kengin an pan hnuah an suasam zui nghal a, H. Vanlaldika leh a chhungte hian an hnamdang thiante chu inbiakpawhna hmangin an chanchin hrilha an zualko hnuah, khawtual mi hnamdang an hmelhriat te chu rawn pungkhawm ve in, misual te an tlanchhe ta nia thudawn a ni a, he thil thleng ah hian H. Vanlaldika te chhungkua-a mi 5 te chuan hliam tuarin Aizawl lama enkawl tura rawn lakchhoh nghal an ni.

Bairabi Zophai-a buaina thlenna hmun hi nimin khan bialtu MLA leh LAD Minister, K. Lalrinliana chuan a hmunah tlawhin he buaina thleng ah hian kawng laitu, Assam lamin an tih dikloh hmasak thu a sawi a, Zophai-a ramri tihhmasawnna tur a ruahmanna awmte chu kalpui chhunzawm a nih tur thu sawiin, heng leilet hmun neituten an leilet te an enkawl tha lova, hnam dang kutah hun rei tak an dah avangin buaina hi chhuak thin a nih thu a sawi bawk.

@@@@

Ramri-a buaina pawi ti

Nimin-a MNF Legislature Party thukhawm chuan Zophai-a Assam mi thenkhat ten kan ram-chhunga harsatna an rawn siam chu pawi an tih thu sawiin, Gharmura Mission Compound-a nu-nau pawisawi lo te kut thlak a, thisen an chhuah mai bakah In leh lo in diriam sak leh In hal sakna hial a thleng chu pawi an tiin an dem takzet tih an sawi a. Chief Minister hova MNF Legislature Party thukhawm chuan a tul anga mipuite thlamuan tur leh thlavang hauh turin Minister, R. Lalzirliana hovin MLA rual a hmuna kal tur an ruat nghal a ni.

ZPM Legislative Party member, Lalsawi-vunga MLA leh Dr. Vanlalthlana MLA te pawhin niminpiah-a Bairabi Zophai-a buaina thlenna hmun hi nimin khan tlawh nghalin helai hmun an tlawh lai hian Assam I.B. leh Assam Police thenkhat rawn lutin an MLA te hovin an lo hnawt-kir tih an sawi a. Ramri buaina avanga Assam Police in an hliam, Mizo thalai damdawi In-a awm te an kan bawk. ZPM Party chuan he buaina avanga Gharmura Mission Field-a Missionary leh an chhungte Mizoram lama an sahimna tura rawn lutte chu Bairabi-ah an lo dawngsawng bawk.

BJP Mizoram Pradesh chuan he thil thleng hi an dem thu sawiin, Zophai buaina avanga Bairabi VC President leh Secretary ten Muslim misualte kut an tuar chu pawi an tih thu an sawi a, he thil thlenga mawhphurtute chu man chhuah an nih theih ngei na turin Assam Chief Minister, Assam BJP President bakah NEDA Convener te hriattir nghal a nih thu an sawi bawk.

PC Party pawhin he thil thleng hi hriatthiam harsa an tih thu sawiin, hetianga pawisawi lo Mizote, an nunna hial pawh laksak duh khawpa bei duhtu hnamdangte hi a rang thei ang bera man chhuaka an phû tawk hremna pek an nih ngei theih nan chak taka hma la nghal turin Mizoram sawrkar an phut thu an sawi bawk.