Latest News

Serchhip District-a COVID-19 Frontline Workers te Covid vaccine pek tan an ni

Serchhip District-a a vawikhatna atan Inrinni atang khan COVID-19 hri leng dona kawnga a hmatawng a thawktu, Frontline Worker te hnenah COVID-19 vaccine pek tan niin Mizoram-a a hmasa ber nia hriat a ni a. Hetihlai hian Health Care Workers te hnena Vaccine pek chu zawhfel thawkhat a ni tawh thung.

Serchhip District-a COVID-19 vaccine, Covishield pek hna kalpui mekah hian Inrinni khan a vawikhatna atan Frontline Worker te hnenah vaccine hi pek tan niin 8th Assam Rifles-a Frontline Workers te hnenah vaccine hi pekchhuah a ni a, vaccine hi Army Unit Hospital-ah pek niin he hun hi Assam Rifles Commandment, Col. Junior Mutum, SM chuan a hmanpui a ni.

Serchhip-a Battalion Hqrs. nei 8th Assam Rifles atang hian hri danna la turin mi 1038 inziaklut an awm a, Inrinni khan mi 100 te hnena vaccine pek tura ruahman chu pek kim vek an ni a, nimin khan mi 100 bawk pek leh tura ruahmanah mi 86 te pek an ni thung a ni. Inrinni-a hri danna pe tura kal Serchhip District Hospital atanga Vaccination Team te hian Unit Hospital-a thawktute chu vaccine pekna atana pawimawh te zirtir nghalin anni hian hri danna hi an pe chhunzawm dawn a ni. Frontline Worker te hnena vaccine pek hna kalpui mek ah hian nimin khan Serchhip-a BSF sipai awm mek te hnenah vaccine hi pek leh niin mi 100 pek leh a nih thu CMO Office atanga kan thudawnna chuan a sawi bawk.

Hetihlai hian Serchhip District-a Health Care Workers te hnena Vaccine pek chu zawhfel thawkhat niin mi 697 hnenah vaccine hi pek a ni a. Serchhip CMO Office atanga thu kan dawn danin Inrinni khan Serchhip-a Health Care Workers mi 34 te hnenah COVID-19 Vaccine hi pek chhunzawm leh a ni a, heti hian Inrinni thleng khan Serchhip District-a Health Care Workers mi 697 hnenah vaccine hi pek ni tawhin Ser-chhip-ah mi 360, Thenzawl CHC-ah mi 106, Khawlailung PHC-ah mi 37, Ngentiang PHC-ah 36, North Vanlaiphai PHC-ah 63, East Lungdar PHC-ah 44 leh Chhingchhip PHC-ah mi 51 te chu vaccine hi pek an ni ta a ni.

Serchhip District-a Health Care Workers te zingah hian hri danna la tur zinga la la thei rihlo an awm nia thudawn a ni bawk a, hri danna la tawhte tan hian Dose 2-na chu tunkar hian lak leh theih tan tura ruahman a ni.

Comments

Popular News (Last 30 Days)