Mizoram-ah hri kai thar 1 leh enkawl dam 2 an awm

Niminpiah khan Mizoram-ah Sample 1207 enfiah niin hri kai mi pakhat hmuhchhuah a ni.

Niminpiah-a Mizoram-a COVID-19 hri kai hmuh hi Rapid Antigen Test hmanga Sample enfiah 1062 atanga hri kai hmuh niin a hma ni-a Lunglei Lunglawn-a hri kai hmuhchhuah tawh in a chenpui niin taksa-a hri kai lanchhuahna neilo a ni. Niminpiah khan ZMC Laboratory-ah Sample 137 enfiah niin hri kai hmuh an awm lova, District hrang hranga TrueNat Laboratory-ah Sample 8 enfiah niin hri kai hmuh an awm lo bawk a ni.

Nimin khan Mizoram-a COVID-19 hri kai enkawl mi 2 te chu enkawl dam niin hri kai enkawlna hmun atanga chhuahtir ve leh an ni a, heti hian nimin tlai dar 5:00 thleng khan Mizo-ram-a hri kai hmuhchhuah chu 4391 niin hri kai hmuhchhuah atang hian 4363 te chu enkawl dam an ni tawh a, hri kai hmuhchhuah atanga za zela 99.36 te chu enkawl dam ni tawhin tunah hian hri kai enkawllai 19 an la awm a, hri kai zingah nunna chan mi 9an awm tawh bawk a ni.

Nuai 75 vaccine pe tawh :

 India ramah nimin zing dar 8:00 thleng khan mi nuai 75 chuang te hnenah COVID-19 Vaccine pek a ni tawh. Ministry of Health and Family Welfare thuchhuah tarlan danin nimin zing dar 8:00 thleng khan India ramah mi 75,05,010 te chu COVID-19 hri danna hi pek ni tawhin India ram chu khawvela COVID-19 vaccine sem-chhuak hnem ber a ni mek a, Vaccine dawng tawh 75,05,010 zingah hian Health Care Worker 58,14,976 an awm a, a dang 16,90,034 chu Frontline Workers te an ni. Darkar 24 chhung khan ramchhungah COVID-19 kai thar 9,309 an awm a, hetih rual hian enkawl dam 15,858 an awm thung a, rampumah hri kai zinga zaa 97.32 te chu enkawl dam an ni tawh bawk.