Ramri-a buaina Rajya Sabha MP in a thlen

Mizoram Rajya Sabha MP, K. Vanlalvena chuan niminpiah tlai khan Union Minister of State for Home, G. Kishan Reddy chu a Office Chamber-ah hmuin kumin February ni 9 zan-a Bairabi Zophai leh Garmurra (Assam)-a thil thleng chungchang leh thildangte a thlen.

Union Minister of State for Home hnenah hian Rajya Sabha MP, K. Vanlalvena chuan Mizoram chhunga Mizoram sawrkar mi tirhte Assam mi ten kut an lo thlak chungchang leh chumi avanga mihring chenna In hal te, Garmurra Mission Compound-a Mizo Missionary chhungkua te chunga kutthlak a nih thu te a thlen a. Assam chuan thenawm State dangte nen ramri buai an neih vek thu leh hei hi British Administration in ramri diklo a hnutchhiah vang a ni tih sawiin, Assam State-a bet lo tur behtir avanga harsatna hi thleng thin a ni tih a sawi a. Central sawrkarin a rang thei ang bera ramri dik a siam loh chuan hmarchhak State te chu ramri chungchangah ram hrang leh ram hrang ang maia indo thei an nih thu a sawi bawk.

Mizoram Rajya Sabha MP chuan kum 2019-a Mizoram All NGO te nen Delhi-a Meeting an neih tumin Union Home Minister, Amit Shah chuan Mizoram chhung Bangladesh Border-a duty tur Mizo tlangvalte puala BSF Battalion din a lo tiam tawh chu tih hlawhtlin a tul thu pawh Minister hnenah hian a thlen a. Hei hi tih hlawhtlin thuai a nih loh chuan Mizoram mipui ten NDA sawrkar chu rintlak lovah an ngaih phah a hlauhthawn thu a sawi bawk.