Latest News

Commerce & Industries Minister in Silsuri-a Border Trade Centre hmun tur a tlawh

Mamit District chhung Silsuri khua-a Border Trade Centre hmun tur chu nimin khan Commerce & Industries Department changtu Minister, Dr. R. Lalthangliana chuan a tlawh.

Commerce & Industries Minister hian Border Trade Centre chu Mizoram mipuite tana tangkai tak anih tur thu sawiin, kan ram mamawh chakkhai lakluh nan leh kan ram tharchhuahte hralhchhuahna atana hmun pawimawh leh tangkai tak a la nih ngei a beisei thu a sawi a. Silsuri khua-a Border Trade Centre emaw, Border Haat siam chu Sawrkarin a ngaihpawimawh berte zinga mi a ni tih sawiin, Bangladesh atanga bungrua lakluh chauh ni mai lovin, kan ram tharchhuah Sawhthing, Chhawhchhi, Hmunphiah leh thil hrang hrangah insumdawntawnna tura lo intodelh turin a chah a, SEDP hnuaiah chak taka hmalak anih dawn thu leh Marked Shed pawh sa thuai tura hmalak anih dawn thu a sawi bawk.

Minister chuan Sawrkarin Trade Centre hmun tur leina tur chu tun maiah a la neih mai dawn loh thu sawiin, an khawtlang hmasawnna tur anih hre renga VC ram emaw, mimal ram emaw phal taka pe thei an awm chuan a lawmawm hle ang tih a sawi a. He Trade Centre hi hlawhtling taka kalpui anih hunah chuan kan ram economy-in nasa taka a changtlun phah dawn avangin hmanhmawh leh chak taka kalpui turin Sawrkarin hma a la mek a. A tul dan ang zelin Bangladesh leh Ministry Govt. of India pawh sawipui zel anih tur thu a sawi bawk. Minister hi khawtlang mipuite nen inkawmin Bangladesh lam Mahmuam leh Chhippui-a Mizo te nen pawh an inkawm bawk a ni.

Silsuri khua leh Bangladesh inkar Khawthlang Tuipui kamah hian thenawm ram, Bangladesh nen mumal taka insumdawntawn theihna hmun tur Border Trade Centre kan neih theihna turin Commerce and Industries Department kaltlangin Sawrkar-in hma a la mek a. He Border Trade hi hlawhtling taka kalpui anih chuan helai tlangdung mipuite'n nasa taka an chhawr tangkai tur niin eizawnna kawngah hmasawnna rahbi pawimawh tak a ni dawn a ni.

Comments

Chhiar Hlawhte