Synthetic Running Track phah hna zawhfel a ni

Serchhip Hmar Veng Sport Complex-a Synthetic Running Track phah hna chu zawhfel thawhkhat a nih tawh thu he hna thawktute chuan sawiin, hun reilote ah thuneitute hnenah an hlan tur thu an sawi.

Serchhip Sport Complex chhunga Synthetic Running Track phah hna hi nikum October 27 khan thawh tan niin kumin January 27-a zawh hman tura ruahman a ni a, amaherawh chu harsatna hrang hrang avangin he hna thawktu Syncot International hian hemi hun chhung hian an zo hmanlo a ni.

Hemi hnua helai hmun tlawhtu Ser-chhip-a thuthar thehdarhtu thenkhat te hnenah Feb. 8, 2021-ah an zawh hman tur thu an sawi angin tunkar Thawhtanni khan Rubber pah hna chu an zofel tih he hna thawktute chuan an sawi a, tun dinhmunah chuan Track Line Marking chiah hna hmabak awm tawhin he hna thawk tur hian mithiam dang chahluh leh a ngaih dawn thu leh sawrkar duhdan anga Quarantine an paltlang leh phawt a ngaih dawn avangin hna tan hun erawh an sawi theihloh thu an sawi a ni.

Sport Complex chhunga Synthetic Running Track phah nan hian cheng vbc. thum rua-hman a ni a, hri leng avang leh Thlasik lai-a sik leh sa a danglam avangin ni 15 velin hna zawh hun tur a ruahman sa an bawhpelh a, Line Marking tihna tur Rawng te leh mithiamte an lo thlena hna an thawh theih chuan ni 7 chhunga zawh hman an beisei thu thawktute chuan an sawi a, hemi hnu hi chuan sawrkar kutah an hlan tawh mai tur thu an sawi bawk.