Latest News

MJA Serchhip District member ten Leng khawtlang hmalakna te a hmunah an tlawh

Rampum-a tuihna tipung tura hma la tha thlanchhuah zinga North East Zone-a lawmman pakhatna dawngtu, Leng khua chu nimin khan MJA Serchhip District ten tlawhin an hmalakna hrang hrangte an enfiah.

Mizoram sawrkar-a Information & Public Relations Department buatsaiha Leng khua tlawhtu MJA Serchhip District Member te hi Serchhip DIPRO, K. Saitluanga chuan kaihruaiin Leng khaw VCP, B. Vanlalfinga leh a thawhpui ten an lo dawngsawng a, Leng YMA Run-ah inkawmna neiin Leng VCP, B. Vanlalfinga chuan Serchhip-a chanchinbu mi ten Leng khua an tlawh thei chu lawmawm a tih thu sawiin, Leng khaw Village Council te hmalakna a sawi a. VC inthlan hmaa an Manifesto te tha taka an tih hlawhtlin thu sawiin, VC term hmasa ah phei chuan Manifesto za-a za an tih hlawhtlin thu a sawi a, NGO pawl hrang hrangte nen tha taka an thawhho thin thu a sawiin, tun dinhmun an thlen theihna chhan chu khawtlang tanrual vang a nih thu a sawi bawk.
    Leng khua hi Serchhip District chhung, North Vanlaiphai Sub-Division, E. Lungdar RD Block huamchhunga awm a ni a. Chhungkaw 184 chuang cheng mekin mi 900 vel an khawsa mek a, Leng khua hian faina kawngah te, ram kanglo tura hmalakna ah te leh tuihna humhalh kawngah nasa taka hma la thin in lawmman pawh engemaw zat an lo la tawh a, kum sarih chhung zet Malaria case an nei tawh lova, kum 13 chhungin naupang kum nga hnuailam thi an nei tawhlo bawk a ni.
    Leng khua hian kum 2016 leh 2019-ah Serchhip District chhunga ram tikanglo tura hma la tha lawmman pahnihna dawngin, kum 2018 khan hma la tha ber ah thlan an lo ni tawh bawk a. Kum 2017-ah Mission Antiodaya hnuaiah Mizoram-a thingtlang khaw fai ber leh Village Council inrelbawlna tha bera thlan an lo ni tawh bawk a. India ram pumpuia Tuihna tipung tura hmala tha thlanna, 'National Water Award-2019' chu dawng tawh bawkin, India Hmarchhak State-a khaw hrang hrang zingah Leng khua hian Best Village Panchayat nihna hauhin, lawmman pakhatna an lo la tawh bawk a ni.
    Nimin-a an inkawmna hunah hian Leng khaw Village Council hnathawh leh hmalakna hrang hrangte chu MJA Member te hian an zawtfiah bawk a, an hmalakna te pawh hi a hmunah an tlawh nghal bawk a ni.

Comments

Chhiar Hlawhte