Chanchin thar thenkhat :

 House-ah sum harsatna sawi

    Nimin a Assembly thutkhawm neih ah PWD changtu Chief Minister, Zoramthanga chuan ZPM member, Vanlalhlana zawhna leh zawh belhna dang te chhangin State Sawrkar sum fai dinhmun a harsat avangin tunah hian Bill tam tak lak theih a ni lova, hlawh lak chung-changah pawh a la tlai deuh an awm thin tih a sawi a. COVID-19 hri leng vangin harsatna a thleng a, Sawrkar laipui pawhin harsatna a tawk tih sawiin, Chhiah leh thildang atanga Central in pawisa a rawn pek tur ringawt ah pawh tun kum kalta chhungin cheng Vbc. 1000 an dawng kimlo tih a sawi a, hetiang a ni chunga an la kal thei hram hram chu a lawmawm zawk tih sawiin, sum leh pai-a harsat avang hian tan pawh an la nasa hle tih a sawi bawk.

Khuahkhirhna thlahdul hret
    Disaster Management & Rehabilitation Department chuan thuchhuah siamin hri leng vanga inkhuahkhirhna hman mek thu thlahdul hlek a ni a, hemi ang hian zan lama Curfew kalpui mek chu zan dar 10:00 atanga zing dar 4:00 thleng kalpui a ni tawh dawn a ni. Hei bakah hian thla thar, March 1 atangin pawl 5 atanga pawl 8 inkar ten School an lut tan thei tawh dawn bawk a, Zirlai School kal turte chu hri lakah an fihlim em tih endik vek tur a ni. Hei bakah hian District khawpuia sumdawnna hmun te chu zan Curfew tan hun bawhbuai lo tawka an inhawn phalsak an ni a, District khawpui ni lo, hmun dangah chuan dawr hawn hun chhung inkhuahkhirhna a awmlo thung ang.

Zophai kawng siam tumna awmlo
    PWD changtu Chief Minister, Zoramthanga chuan Kolasib District-a Zophai panna kawng chu tunhnaiah siam tumna a awm lo tih nimin a Assembly inkhawm ah a sawi a, KM 4-a thui he kawng hi kum 2019 khan Thingdawl-a PWD National Highway Division V-in cheng nuai 100 sengin an siam tih sawiin, tunah pawh thawh mek a nih thu a sawi bawk.

Mizoram Sangha thar zat
    Fisheries Minister, K. Lalrinliana chuan kum 3 kalta chhunga Mizoram in Sangha a thar-chhuah zat chu kum 2018-ah quintal  74460.10, kum 2019-ah quintal 73314.70 leh kum 2020 chhungin quintal 49381 a ni tih Assembly House a hrilh a, Mizoram in kum khat-a Sangha a thar-chhuah hian kan mamawh atanga 52.7% vel a phurhru anga chhut a nih thu a sawi bawk. Phai atanga Sangha lakluh chu an Department thu-neihna a nih loh thu leh a thianghlimna pawh an hriatpui loh thu a sawi bawk.

Kolasib-ah DC hovin sawiho
    Mizoram leh Assam ramri hrul khua a hmasawnna hna kalpui dan tur chungchang sawiin nimin khan Kolasib-ah sawrkar mi pawimawh te an thukhawm a, he hunah hian District Bawrhsap, Dr. H. Lalthlangliana chuan Assam sawrkar lamin hmalakna an kalpui chak avangin Mizoram lam pawhin chak taka hna kalpui tul a tih thu a sawi a. Hei vang hian Department hrang hrangte chu hna kalpui dan tur duang-a ramri a hmasawnna hna chak taka thawh a tul thu a sawi bawk.