Mizoram-ah hri kai thar 2; enkawl dam pakhat

Niminpiah khan Mizoram-a Sample 932 enfiah niin COVID-19 hri kai mi pahnih hmuh leh an ni a, heng mite hi State pawn atanga tunhnaia rawn lut an ni thung.

Niminpiah-a Mizoram-a COVID-19 hri kai hmuhchhuah te hi ZMC Laboratory-a Sample enfiah 81 te atanga hmuhchhuah niin Border Security Force (BSF) mi leh sa, tunhnaia State pawn atanga Mizoram-a rawn lut niin taksa-a natna hri kai lanchhuahna neilo an ni. Nimin khan District hrang hranga TrueNat Laboratory-ah Sample 10 enfiah niin hri kai hmuhchhuah an awm lova, Rapid Antigen Test hmanga Sample enfiah 841 atangin hri kai hmuhchhuah an awmlo bawk.

Nimin khan Mizoram-a hri kai enkawl mi pakhat chu chhuahtir leh a ni bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah chu 4388 niin mi 4359 te chu enkawl dam an ni tawh a, hri kai hmuhchhuah atanga za zela 99.33 te chu enkawl dam ni tawhin tunah hian hri kai enkawllai 20 an la awm mek a, hri kai zingah nunna chan mi 9 an awm tawh bawk a ni.

Tun dinhmun ah Mizoram-a District 11 awm zingah District 3 ah chian COVID-19 hri kai enkawllai an awm tawh a, hri kai enkawllai mi 20 la awm zinga 15 te chu Aizawl District-a enkawl niin Lawngtlai District-ah mi 3 leh Lunglei District-ah mi 2 enkawl an ni bawk a. Siaha, Champhai, Kolasib, Serchhip, Mamit, Khawzawl, Hnahthial leh Saitual District-ah te hri kai enkawllai an awm tawhlo a ni.