Khawnvartui chungchang chhui zui mek zel a ni

Tunhnaia Serchhip-a dah tur Khawnvartui barel 10 hralh nia sawi chungchang chu sawrkar chuan chhui zuiin thu zawhfiah ngai te zawhfiah mek an ni a, hemi chungchangah hian Serchhip DCSO chuan Serchhip Police Station-ah FIR thehlutin chhui zui mek a ni bawk.

Serchhip District Consumers Association (SDCA) hruaitute hnen atanga thu kan dawn danin Serchhip-a dah tur Khawnvartui barel 10 hralh chungchang ah hian SDCA chuan Khawnvartui hralh te hi rulh leh an phut bakah thil tisualtu hi chhuichhuaka a chunga action la turin sawrkar chu an phut tih an sawi a. Hemi chungchang ah hian Feb. 22 khan Transporter/Contractor pawh Serchhip-ah rawn kalin Khawnvartui hralh chu pawi a tih thu leh a theih anga dapkhawmin an rulh leh tur thu SDCA hnenah hian a sawi tih an sawi a ni.

He thil thleng chungchang hi sawrkar pawhin a bengkhawn thu sawiin SDCA chuan, Feb. 23 khan hemi chungchang chhui tura ruat te chuan SDCA hruaitute hi thu an zawhfiah thu pawh an sawi a, an thil hmuh leh hriat zawng zawng te kimchang taka an hrilh thu sawiin, he thil thleng hian hun lo kal zel turah nghawng tha a thlen ngei an beisei thu an sawi bawk.

Hemi chungchang chhui tura sawrkar in a ruat te hnen atanga thu kan dawn danin he thil thleng chungchangah hian Serchhip SDCA leh Legal Metrology Department hotute leh DCSO chu thu zawhfiah ni tawhin, a thil hmuh ang ang te chu a rang lamin sawrkar-ah a thehluh tur thu a sawi a ni.

Hetihlai hian Serchhip DCSO, C. Zadai-lova chuan tun thla ni 23 khan Serchhip Police Station-ah FIR thehlutin Serchhip District Consumers Association ten thuchhuah siama an tarlan, K. Oil litre 2258.80 Serchhip thleng tur thleng thalo chu a thlen kim leh ngei theih nana hma lak sak turin a ngen bawk a ni.