Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Chanchin thar thenkhat :

SBI Gram Seva Kendra hawng

SBI Foundation leh Goodwill Foundation te tangkawpin an buatsaih, SBI Gram Seva Kendra hawnna chu nimin khan Agriculture Minister, C. Lalrinsanga chuan Mamit District-a Bawngva khua ah a hmanpui a, he hunah hian Minister chuan Gram Seva Project hnuaiah hian zirna kawnga hmasawnna te, hriselna leh hmeichhe chawi-kanna lam leh development activity lokal tur a tam hle tih sawiin, heng te hi hmang tangkai thiam turin mipuite chu a chah a ni. Gram Seva Kendra hi SBI Gram Seva Project hnuaia peng pakhat niin thingtlang khaw mipui ten he Centre atang hian Sawrkar Scheme chi hrang hrang te leh Development thil tam tak an hmuha an hriat zung zung theihna tura buatsaih a ni.


CM hovin thutkhawm nei

Mizoram Bharat Scouts & Guides State Council Meeting chu nimin khan an Chairman Chief Minister, Zoramthanga hovin Chief Minister Office Conference Hall-ah neih a ni a, he hunah hian Chief Minister chuan Scouts & Guides chu thalai te nun kaihruaitu tha, mahni inthunun theihna leh hmangchang tangkai tak tak zirchhuahna a nih avangin enrollment pawh an pun chhoh zel a beisei thu a sawi bawk. He Meeting-ah hian kum 2021-22 chhunga program hman tur hrang hrang an ruahman chu pawm a ni a. Pawl inkaih-hruaina, State Bye-laws thar chhawpchhuah pawh pawm niin, kum 2021-2025 chhunga State Council hruaitu thar turte thlan a ni bawk.


Zirlai 15 scholarship hlan

Mizo Zirlai Pawl (MZP) General Hqrs. leh GIG Motors tangdun buatsaihin nimin khan kum 2020 High School Leaving Certificate Examination-a Top 10-a Mizo zirlai tlingte Scholarship hlanna hun Aizawl-a MZP Office-ah neih a ni a, he hun hi School Education Director, James Lalrinchhana chuan khuallian nia hmanpuiin MZP President, B. Vanlaltana pawhin a hmanpui a ni. He hunah hian zirlai mi 15 hnenah Scholarship hi hlan a ni.


Sum harsatna sawifiah

MNF Vice President, Lalthlengliana chuan nimin khan Aizawl Press Club-ah thuthar theh-darhtute kawmin AMC inthlanna lo awm turah thudik leh diklo hmanga inbeihna tam tak a awm tih a sawi a, State Sawrkar sum chungchanga Congress ten, ‘Sum a harsa, Treasury an khar tep,’ tih an sawi chu chhangin, COVID-19 hripui leng avangin khawvel pumpui a buai tih a sawi a, India economy thlengin a tlakhniam thu leh Mizoram pawhin hei hi nasa takin kan tuar tih sawiin, “Heti chung hian Development-ah nasa takin hma lak a ni a, vawi khat mah Treasury kan la khar ve lo. Sawrkar hnathawkte hlawh vawi khat kan puksak pawh a hnu lawkah rulh lehnghal a ni,” tiin “Vawiin thleng hian Zoram mipuiin harsatna kan la tawk lo,” a ti bawk.


ZPM in theihtawp chhuah

Nimin khan ZPM Vice President, Dr. Kenneth Chawngliana chuan Aizawl Press Club-ah thuthar thehdarhtute kawmin Mizoram-ah sawrkar tha tundin a nih theih nan ZPM chuan an theihtawpin an bei mek tih a sawi a, “Kan ram-ah langtlang sawrkar, hriatpui theih leh hriatpui tlak sawrkar, dan leh hrai-in awmzia a neihna sawrkar, thuneihna semzai sawrkar a awm theihna turin mipuite tawiawmna kan mamawh,” a ti a. Aizawl khawpui chu kawng hrang hranga hma a sawn theih nan awmze neia enkawl a tul tawh takzet tih sawiin, hei vang hian AMC inthlan lo awm tur chu an lak thutak thu leh he inthlanna a hnehna chan chu hlawhtlinna ah an ngei mai dawnlo tih sawiin, inthlanna ah chak an inrin thu a sawi bawk.

Comments

Chhiar Hlawhte