Latest News

YMA ten Serchhip leh Thenzawl inkar Mat lui-a Lei dawh tha thawkhat ah an ngai

Serchhip leh Thenzawl inkar Mat lui-a Lei dawh mek chu nimin khan Serchhip Sub-Hqrs. YMA chuan tlawhin hnathawh kal mek an enfiah a, he Lei dawh hna thawktute thawh dan leh an hnathawh tawh chin chu lungawithlak tawhkhat nia an hriat thu an sawi.

Nimin-a Mat Lei dawh hna thawh mek entu Serchhip Sub-Hqrs. YMA Vigilance & Monitoring Committee leh Serchhip Sub-Hqrs. YMA hruaitute hi Lei dawh hna thawktu, Tantia Construction Company hotu ten lo dawngsawngin an hnathawh mek dinhmun an lo hrilh a, he hunah hian Tantia Construction hotute chuan he Lei hi Meter 63 a sei a nih dawn thu sawiin, Lei hi a zau zawng (a kawng awh chin) hi meter 7.5 niin Motor 2 inpel thei (Two lane) tur a nih thu an sawi a. He Lei hi Steel Structure a siam niin Mat lui atanga a Lei chhuat san zawng hi hi a sang lai berah Meter 465.50 a ni a, Metric Ton 250 dawlzo tura duan a ni a. Lei chhuat hi RCC-a chhun tur niin mm 220-a chhaha chhun tur a ni a, kumin April thlaah zawh hman vek tum a ni thu leh Lei dawh zawh hnuah kum khat an vil zui tur thu an sawi a ni.

He Lei dawh hna thawh mek hi Serchhip leh Buarpui inkar kawng, Asian Development Bank (ADB) sum hmanga laihzauh leh siamthat hna thawh mek chhunga awm a ni a, Lei dawhna atan hian cheng vbc. 14.92 ruahman a ni a. A siamtu Engineer te chuan tuna an Lei dawh hi Mizoram lei khawng tha ber anih thu an sawi bawk.

He huna kal Serchhip Sub-Hqrs. YMA hruaitute chuan tuna Lei dawh hna thawh mek chu tha thawkhat nia an hriat thu an sawi a, Serchhip leh Buarpui inkar kawng laih hna thawk mektu Tantia Construction te chu he kawng in a huamchhung, Thenzawl leh Serchhip inkarah kawngsir chhaklam atanga lei tla leh lirthei kal vel tan pawha harsatna thlen thei khawp a awm nual chu an ngaihmawh thu hrilhin, thianfai turin an ngen bawk a. Fur ruahtui tlak hmain kawng-pui sir te tifai tur leh Side Drain te pawh thianfai turin an ngen nghal bawk a ni.

Comments

Chhiar Hlawhte