Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Chanchin thar thenkhat :

Training buatsaih mek zel

Nimin khan Chief Secretary, Lalnunmawia Chuaungo hovin CS Conference Hall-ah Mizoram pawna hnathawka awm, COVID-19 hri leng vanga rawn haw (Returned Migrants Workers) te chhawmdawlna tur, ‘Livelihood Generation For Returned Migrants Workers Due to Pandemic Outbreak Covid-19 Phase-I’ hnuaia North Eastern Council (NEC) in Mizoram sawrkar pawisa a pek cheng vbc. 3 hmanga Department hrang hrangin hma an lakna thlirho a ni a. He huna tarlan a nih danin Commerce & Industries (EDC Planning Department) hnuaiah mi 550 in eizawnna tling kutthemthiamna training an nei tawh a, Labour Employment, Skill Development and Entrepreneurship (LESDE) hnuaiah mi 60 in training nei tawhin MZU Incubation Center hnuaiah mi 30 in training an nei tawh bawk a, Home Base Food Training mi 60 in an nei tawh bawk a ni. Tunah hian Tourist Department hnuaiah Tour Guide Training neih leh tur a ruahmanna a kal mek thu tarlan a ni bawk.

He hunah hian Phase-II atana hmalakna tur NEC in a rawn pek te thlir hovin, District tina Deputy Commissioner te kaihhruaina hnuaiah Skill Development Committee din nise an ti a, he Committee kaltlang hian Skill Training chi hrang hrang - Cement Mistiri, Food Processing, Piggery Farming leh Cake Baking te chu kalpui ni se an ti bawk.


MTKP rorel Inkhawm nei

Baptist Church of Mizoram (BCM) hnuaia thalai pawl, Mizoram Thalai Kristian Pawl (MT-KP) rorel Inkhawm vawi 67-na chu nimin khan BCM Biak In, Electric Veng Lunglei-ah neih a ni a, he hunah hian Budget atan cheng nuai 13 pawmin, TKP member te'n rilru hrisel zawk an neih theih nan MTKP in hmalak nise an tih bakah Fa neih tam inzirtir kawngah MTKP in hma la se an ti bawk. MTKP hi Pastor Bial 88-ah dingin Unit 420 a awm mek a, member 44,228 an awm mek bawk a ni.


Zirlai leh Zirtirtu chawimawi

Mizo Zirlai Pawl (MZP) Sub-Hqrs. buat-saihin nimin khan Thenzawl-a Vantawng Group YMA Run-ah kumin-a Zirlai tithate leh Zirtirtu hna thawk tha te chawimawina hun buatsaih a ni a, he hunah hian Zirlai HSLC leh HSS-LC-a First Division leh a chunglam a pass mi 33 leh Zirtirtu, an Subject-a Letter Mark hmu pha zirlai nei mi 10 te hnenah chawimawina hlan a ni. He hun hi MZP General Hqrs. President, B. Vanlaltana chuan khual-lian niin a hmanpui a ni.


Inhlantharna hun hmang

Aizawl Municipal Corporation (AMC) in-thlanna neih tura ZPM AMC Official Candidate te chuan nimin khan Rokunga thlan, Mission Veng, Aizawl-ah Mizoram khawpui Aizawl siamtha leh tura inhlantharna hun an hmang a. He hunah hian ZPM Leader, Lalduhoma chuan Aizawl khawpui hi dinthar leh a ngai tih sawiin, “ Pu Rokunga’n ‘Ka pianna Zawlkhawpui’ tih hla a ‘Dikna a fam ta, felna a tlawm ta, nun suar ang a chim, tham leh bawlhhlawhna ten tual an leng, awi maw a pawi e mai’ a tih angin, Zofate Jerusalem tia kan lo chhuan ve em em, Mizote khawpui-ah hian dikna a fam a, felna a tlawm ta ni hian a lang,” a ti a. “Keini ZPM Party chuan AMC inthlana sawrkarna kan siam a nih chuan, Pu Rokunga’n felna silhpuan sin-a tho leh tura min koh angin tham leh bawlh-hlawhna te tuallenna lo chang ta Aizawl khawpui hi tundin leh zai kan rel dawn a ni,” a ti bawk.


PAMRA in lawmthu sawi

Peace Accord MNF Returnee’s Association (PAMRA) chuan Remna thuthlung avanga rawn haw te tana Maumual-a sawrkar hmalakna chu lawmawm an tih thu an sawi. Nimin-a thuchhuah an siam-ah PAMRA chuan Chief Minister, Zoramthanga hovin niminpiah khan Chaltlang ram, Maumual-a Mizoram remna thuthlung avanga lo haw te Inhmun cheibawl a teh tha turin Revenue Department hotute chuan thutkhawm an nei tih sawiin, Revenue Department hian a panna kawng siamthatna tur atan JCB-a nawr turin estimate pawh an siam fel thlap tih an sawi a. Chief Minister hian hmalak dan tur sawiin, mimal tin Inhmun teh chhuah vek a Pillar phun a chhinchhiah vek nise a tih bakah a enkawl turin Board pawh a din nghal tih an sawi a, hetianga hmalakna ah hian PAMRA chu an lawm hle tih an sawi bawk.


SEDP atangin ruahman thuai beisei a nih thu sawi

Health Minister, Dr. R. Lalthangliana chuan SEDP hmangin mimal leh chhungkaw tin inkhai-chhuah theihna tur ruahman thuai an inbeisei tih a sawi. AMC inthlanna neih tur puala nimin-a AMC Ward-IX Campaign Committee huai-hawt Public Meeting a hmanpuina ah he thu hi sawiin Health Minister, Dr. R. Lalthangliana chuan tun tum MNF kaihhruai AMC thar lo piang tur hian nasa takin Development a hnuklut dawn tih sawiin, “COVID-19 avangin kum khat chauh ang la sawrkar kan ni a, sawrkarah duhthusam ang la hmu lo inti tan pawh vuina hun a la awm lo, kum thum tha sawrkarna kan la nei a, Covid-te hi a reh ang a, SEDP hmangin mimal leh chhungkaw tin inkhaichhuah theihna tur ruahman thuai kan inbeisei a ni,” a ti a ni.


Upa Pawl te Vitamin sem

MPCC General Secretary, PC. Laltlansanga chuan nimin khan Thenzawl Area MUP-a member 720 vel te tan Vitamin thla khat ei tur a pe. Heng Vitamin semna hunah hian PC. Laltlan-sanga chuan COVID-19 vangin kan in kharkhip a, kum upa te chu sawrkar thuchhuakah In-a tawm tura kan in ngen thin avangin pawn chhuak lovin kan awm thin a, taksa mamawh ang insawizawi pawh a theih loh avangin damdawi tha an mamawh tih a sawi a, hei vang hian Vitamin tal an ei a tul thu sawiin, tun dinhmuna a tih theih tawk MUP te tan Vitamin a pek thu hi a sawi a ni.


Khawbel-ah In pakhat kang

Niminpiah tlai dar 4:30 vel khan Serchhip District chhung Khawbel khua a Anthony Zo-sangkima te In, Assam Type chu bungrua engmah chuh hmanloh in a kangral a, vanneihthlak takin mihring thi leh hliam an awm lo. He In-ah hian In neitute nupa bakah an fate, naupang te te 3 an khawsa a, kangmei hi choka lam atanga intan nia hriat a ni. Kangmei tuartute chenna In tur hi nimin khan Khawbel khua chuan hnatlang in an sak sak nghal a ni.

Comments

Chhiar Hlawhte