VDVK Serchhip hnuaia Aieng sawngbawlna khawl Cooperation Minister in a hawng

Van Dhan Vikas Kendras (VDVK) Serchhip hmalakna hnuaia Serchhip Industrial Co-operative Society-in Chhiahtlang-a Aieng sawngbawlna khawl an bun chu nimin khan Cooperation Minister, C. Lalrinsanga chuan a hawng.

Aieng sawngbawlna khawl hawnna hunah hian Cooperation Department Minister, C. Lalrinsanga chuan hetianga Aieng sawngbawlna khawl hawn a ni chu lawmawm a tih thu a sawi a. He tlangdung-ah hian kuthnathawktu fel leh taima tak tak, bungrua leh hmanrua-a chhawmdawl tlak an awm chu lawmawm a tih thu sawiin, an taimakna leh thawhrimna hriaa hetiang khawl an neih theihna tura ARCS, Serchhip in alo buaipui pawh lawmawm a tih thu a sawi a, taima taka theihtawp chhuaha Aieng ching turin he hunah kalkhawm kuthnathawktu te chu a chah bawk.

Agriculture Minister ni bawk C. Lalrinsanga chuan ei leh bar-a intodelh turin kil hrang hrang atanga hmalak a nih thu sawiin, Department pawhin an theihtawp chhuaha hma an lak thu a sawi a. A Department enkawl Irrigation Department hnuaiah leihnuai atanga tui pump chhuak tur leh Solar Energy hmanga tui pump turte pawha hma an lak thu a sawi a. Serchhip District chhungah pawh FOCUS hmalakna in Mat lui chu hmun sang zawka pump tum a nih thu sawiin, leilet te pawh lei chhungril zawk-a leitha letchhuaka hlawk zawka thlai thar tura hmalak a nih dawn thu a sawi. Minister chuan kan tharchhuah ve theih reng, amaherawh chu rampawn atanga kan lakluh ni si in kan tapchhak a luahlum rei lutuk chu tihtawp tum a nih thu a sawi a, tuna an khawl hawn chu a bultanna ang nia sawiin, mei si in meipui a siam thin angin he hun an hman hian rampum a chhemalh a beisei thu a sawi a, kuthnathawktu te chu engtiklai pawhin an harsatna a hnena thlen hrehlo turin Aieng ching tur chhungkaw 10 te hnenah Aieng chi a sem nghal bawk a ni.

Mizoram State Cooperative Society (MSCS)-a Registrar, Lalrinsanga kaihhruai he hunah hian he khawl enkawltu tur, Serchhip Industrial Co-operative Society Ltd. Secretary, Lalchhanhimi Fanai chuan report pe in an Society chu October 30, 2013-ah Industry chi hrang hrang buaipuitu ten tum thuhmun nei-a inpuitawn a hmasawn tura intelkhawma bul an tan thu a sawi a, kum 2016 atangin Aieng ching-a hma an lak thu sawiin, Organic hlanga kalpui tur a nih thu a sawi a. Aieng herna kalpui tur hian a tirah anmahni siamchawp khawl hmanga bul tanin tunah hian a herna khawl pahnih neiin VDVK hnuaiah hian Aieng pack-na khawl hi an lei thu a sawi a. He khawl hi Kolkata atanga an chah a nih thu leh kumin hian ram Tin 5 hmun-a zau vatin chhungkaw 10 ten Aieng chin bul an tan dawn thu a sawi a, heta an tharchhuah te hi lei sakin helai hmunah hian an sawngbawl dawn thu leh a pack-a hralhchhuah leh tur a nih dawn thu a sawi a. Aieng an leina tur leh an hralhchhuah lehna tur rate erawh hriat ala nih loh thu a sawi bawk.