Cheng nuai 119.69 senga Serchhip-a ARCS Office sak thar Minister in a hawng

Cooperation Department Minister, C. Lalrinsanga chuan nimin khan Serchhip-a Asst. Registrar, Co-operative Societies (ARCS) Office building sak thar chu a hawng a, he hunah hian Minister chuan Chief Minister rua-hmannaa Food, Vegetable & Livestock Market Chain Management a ngheta kalpui thuai a nih tur thu a sawi.

Serchhip P&E Veng huamchhunga sak thar Asst. Registrar, Co-operative Societies (ARCS) Office building hi Ribbon chep chat-a hawngin building thar hawnna puala inkhawm Serchhip DC’s Conference Hall-a neih ah Agriculture Minister chuan Mizoram-a thlai leh sa tharchhuaktu ten mumal leh nghet taka an thil tharchhuahte hralhna an neih reng theih nan leh an tharchhuah mamawh rengtu khawpui-a cheng mipuiten awlsam taka kan ram tharchhuahte an hmuh zung zung theih nan Food, Vegetables & Livestock Market Chain Management nghet, Cooperative kalphung zulzuia MAHFED leh MIZOFED te nena tangkhawma kalpui turin Chief Minister, Zoramthanga chuan ruahmanna a siam thu sawiin, reilote ah a taka kalpui a ni dawn a ni, a ti a. Serchhip kiang-a Mat phai zaute a fan tawh thu sawiin, ram laili-a hetiang hmun tha kan neih hi tunhma zawng aia nasa zawka thlai thar nana siamin Serchhip District atangin Economic eng chhit kan tum dawn a ni, a ti.

Irrigation & Water Resources Department changtu Minister ni bawk, C. Lalrinsanga chuan, Mat phai-ah hmun 31 ah tui verhchhuahna kalpui tura hmalak a nih thu sawiin,Loneitute leh thilsiamna tenau ang chi zawng zawngte chu Cooperative Movement hmanga kalpui zel hi a ngialnghet tih sawiin, thawhhona tha tak zarah kan ram in kan mamawh eitur tharchhuak turin kan bei zel dawn a ni, a ti. Minister hian Serchhip District ah hun rei tak ARCS building nei lova kan awm hnuin Vawiin-ah building thar duhawm tak hawn a ni ta chu thil chhinchhiah tlak tak a ni tih sawiin, ARCS Office hian District chhunga Cooperative Society zawng zawngte chu felfai takin a enkawlin, an hmasawnna tur project pawh a kalpui nual a, kuthnathawktute tan theihtawp an chhuah reng a ni, a ti bawk.

Office building sak thar hawnna hun hi Serchhip Addl. DC, Lalmuansanga Ralte chuan kaihruaiin he huna thu sawitu Serchhip District Bawrhsap, Kumar Abhishek chuan Serchhip ARCS in building thar mawi leh tha tak a nei ta chu lawmawm a tih thu a sawi a, District chhunga Cooperative Society hrang hrang te enkawl kawngah leh Project hna an thawh chinah Ser-chhip ARCS chuan fak a phu tih a tarlang bawk.

He hunah hian PWD Building Division-a SDO, Diana Lalramthari chuan Technical Report pe in cheng nuai 119.69 senga sak Ser-chhip-a Assistant Registrar of Cooperative (ARCS) Office Building hi July 7, 2018 khan sak tan niin nikum July 10 khan sak zawh a ni a, RCC Structure niin Mizopa chhiar-a chhawng thum a ni a, a hnuai berah Type-I Quarters pahnih awmin a chhawng laihawl-ah ARCS Office tak hi awmin Officer Room leh Staff Room te a awm a, a chung berah Type-IV Quarters pakhat a awm bawk a ni.

Serchhip-a ARCS Office-ah hian ARCS hnuaiah thawktu Cooperative Audit Officer (CAO) pakhat, Head Assistant 1, LDC 2, IV-Grade 3 leh Driver pakhat an awm mek a ni.