Thla thar atangin inkhawm theih tawh dawn

Health Minister, Dr. R. Lalthangliana hova nimin-a sawrkar mi pawimawh te thukhawm chuan thla thar, February thla atang khian Pathianni chhun inkhawm leh Inrinni chhun Sabbath Inkhawm chu neih tan tawh nise tha an ti.

Mizoram COVID-19 dinhmun thlirhona (review meeting) nimin-a SAD Conference Hall-a Health Minister hova neih ah hian COVID-19 vanga inkaihhruaina hman mek chi hrang hrangah inthlah-dul hret rel a ni a, Mizoram-a COVID-19 dinhmun uluk taka an thlir hnuah February thla atang chuan Pathianni chhun inkhawm leh Inrinni chhun Sabbath inkhawm chu neih tan tawh nise tha an ti a. Heng inkhawm ah hian Ministry of Home Affairs-in inkaihhruaina a siam zawmin thutna awm zat (seating capacity) chhuta 50% emaw, mi 200 aia tam lo ah a tlem zawk zawk tel theih a ni ang.

Hei bakah hian Class X leh Class XII Board Exam turte tan January ni 22, 2021 atang Class kal chhunzawm tura rel a ni bawk a, Board exam turte tan Hostel-a luh phalsak an ni bawk a, amaherawhchu Rapid Antigen Test paltlang vek an nih a ngai thung. Hemi chungchanga inkaihhruaina kimchang chu State Executive Committee on Disaster Management in ruahmanna an siam ang.

Nimin-a thurel zingah Mizoram pawn atanga lo lutte Swab Sample Test sak dan leh Quarantine dan ruahmanna siamthat a tel a, Health & Family Welfare Department-in a kalpui dan tur ruahmanna an siam dawn a ni. Nimin Meeting-ah hian chhiatni thatni a mihring kal phalsak chin pawh tihpun rel a ni a, zan curfew pawh thlahdul tha tih a ni. Aizawl khawpui chhunga lirthei tlan dan pawh thlak tur a ni a, sumdawnna hmun bakah Hotel, Picnic Spot, Gym leh infiamna hmunhma hman dan chungchanga inkaihhruaina pawh thlahdul hret rel a ni a. Inkaihhruaina thar hman tan hun leh kalpui dan tur kimchang hi State Executive Committee on Disaster Management in a duang dawn a ni.