Chanchin thar thenkhat :

Hri kai hmuh belh awmlo

Niminpiah khan Mizoram-ah Sample sang chuan enfiah niin COVID-19 hri kai hmuhchhuah an awm lova, Mizoram-a COVID-9 hri kai hmuh-chhuah chu 4310 an la ni. Niminpiah khan ZMC Laboratory-ah Sample 382 enfiah niin District hrang hranga TrueNat Laboratory-ah sample 133 enfiah a ni bawk a, Rapid Antigen Test hmanga Sample 521 enfiah ni bawkin niminpiah khan Mizoram pumah Sample 1036 enfiah a ni a, heng atang hian COVID-19 hri kai hmuhchhuah an awm lo a ni. Nimin khan Mizoram-ah hri kai mi 7 te chu enkawl dam leh niin heti hian nimin tlai dar 5:00 thleng khan Mizoram-a COVID-19 hri kai hmuhchhuah chu 4310 niin an zinga 4212 te chu enkawl dam an ni tawh a, hri kai atanga zaa 97.72 te enkawl dam niin tunah hian hri kai enkawllai mi 89 an la awm a ni.

Lirnghing sawihona nei

Directorate of Science & Technology buatsaihin nimin khan Aijal Club-ah kum 2020 chhunga Mizoram hmun hranga hranga lirnghing chungchang zirchianna, ‘2020 Earthquakes in Mizo-ram’ Seminar neih a ni a, he hun hi Planning (Science & Technology) Department Commissioner & Secretary, Dr. C. Vanlalramsanga chuan khuallian nia hmanpuiin kum 2020 chhung khan Mizoram hmun hrang hrangah lir a nghing tih sawiin, hetiang khuarel chhiatna hi pumpelh theih ni lo mah se mithiam bikte ruahmanna in a lo inven theih a, thuneitute thu awih hi khua leh tuite mawh-phurhna a nih rualin mithiam te pawhin chiang leh chik zawka chhiatna lo thleng thei hi zirchian a tul thu leh he Seminar hian Mizoram sawrkar tana policy tha a hrinchhuah ngei a beisei thu a sawi bawk.

Inhlantharna hun hmang

Mizo naupang leh thalai ten Ruihhlo tello nun duhawm zawk an neih theih nana kaihruaitu pawl, Foundation For Drug-Free Mizoram chuan nimin khan kumthar atana inhlantharna hun an hmang a, Sports Minister, Robert Romawia Royte chuan a hmanpui a ni.

Kolasib-ah MYC Coaching Centre hawng

Mizoram Youth Commission (MYC) in Kolasib PS-VIII, Kolasib Vengthar-a Civil Service Coaching Centre an siam chu nimin khan Supply Minister, K. Lalrinliana chuan a hawng. MYC Coaching Center hawnna hunah hian bialtu MLA ni bawk, K. Lalrinliana chuan hmasawnna thleng tura thil pawimawh hmasa tak pakhat chu rilru put hmang siamthat a ni tih sawiin, chumi atan chuan he Coaching Center hi tangkai tak a hman a nih ngei a beisei thu a sawi bawk. He hunah hian MYC Chairman, Dr. Vanlaltanpuia pawhin MYC tobul leh thalaite tana eizawnna rintlak kawhhmuh kawnga an hmalak dan hrang hrangte a tarlang bawk a ni.

BJP Office hawnna nei

BJP Mizoram Pradesh chuan kumin (2021) atana Aizawl-a an Office hawnna hun nimin khan hmangin AMC inthlanna neih tura an party Candidate tur a thawhkhatna atan an puang a, he hunah hian an President, Vanlalhmuaka chuan  BJP Mizo-ram te chu Ram leh hnam tana hnathawk tura inpe an nih angin kumthar atan rilru thar nen in-buatsaih turin a sawm a, BJP Member zawng zawngte chu Krista rilru pu chunga Mizoram leh hnam dinchhuahna tur atana hnathawk turin a chah bawk. Nimin a he hun hmanna ah hian AMC inthlanna neih tura BJP Candidate tur a thawh khatna atan puan niin tun tumah hian Ward 8-a an Candidate tur an puangchhuak a ni.