Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Revenue Minister in hmanpui

Land Revenue & Settlement (LR&S) Department chuan nimin khan kumthar atana inhlan-tharna hun hmangin he hun hi Revenue Minister, Lalruatkima chuan a hmanpui a ni.

Aizawl-a Revenue Directorate-a Land Revenue & Settlement (LR&S) Department inhlantharna hunah hian Revenue Minister, Lalruatkima chuan COVID-19 avangin kum kalta ah harsatna kan tawk a, March 22 atanga tanin kumtluanin inkhuah-khirhna kan kalpui a, kan nunphung a khaihlak a, sawrkar tan pawh rorel thiam a har em em a, chutiang paltlanga kum 2021 dam taka kan chuangkai hi a lawmawm takzet a ni, a ti.

Revenue Department kalphung chu danin uluk taka a phuar, Department dang nena kal dan inang lo a ni tih sawiin Revenue Minister chuan, Chenna Inhmun pe chhuaktu an nih avangin an mawhphurhna a sang em em a, mipui rawng-bawltu, mipui nena indawr reng an nih avangin hawihawm leh taimak chhuah a ngai tih a sawi a, Conduct Rules in a phuar sawrkar hnathawk te chu danin tih leh tih loh tur a sawi te zawm a, mawhphurhna hlen turin a chah bawk.

He hunah hian khual zahawm Revenue Department Secretary, R.Zarzosanga chuan kum kalta chhunga Revenue Department hmalakna tarlangin, kum kalta chhung khan Land Revenue & Settlement Department chuan House Pass 302 leh Land Settlement Certificate 102 a pek-chhuah thu te; Land Dispute Case 268 chinfel a nih thu te; November 2020 thleng khan Chhiah cheng nuai 1095.31 leh Registration Fee & Stamp Duty cheng nuai 1884.81 an lakkhawm thu a sawi a. Revenue Secretary chuan Revenue Department chu mi chhungkaw ro khawih a, kumkhaw ro pechhuaktu an nih avangin an hnaah an fimkhur a ngai em em tih a sawi bawk.

Nimin a he hun hmanna ah hian Survey Manual bu thar ber chu tlangzarh a ni bawk.

Comments

Chhiar Hlawhte