Latest News

Serchhip DEF Crime Review Meeting neih a ni

 Kum 2019 aiin 2020-ah thubuai ziahluh a tlem zawk

Serchhip District Police te chuan nimin khan Crime Review Meeting neiin kum hnih kalta chhunga Serchhip District chhunga thubuai ziahluh dan dinhmun an thlirho a, Police Officer te tan infuihtharna hun hman a ni bawk. He huna tarlan a nih danin nikum hmasa aiin nikum chhungin Serchhip District-ah thubuai ziahluh a tlem zawk a ni.
Serchhip District Executive Force (DEF) Crime Review Meeting hi Serchhip SP Conference Hall-ah neih niin Addl. SP, PC. Laltanpuia chuan a kaihruai a, Police ten kum bi te, thla bi leh hunbi neia an hmalakna thlirletna hun an neih thin thu sawiin, hetianga inhmuhkhawmna leh infuihtharna an neih hi chak lehzuala hna an thawhna atana thil tangkai a nih thu leh Serchhip District chhungah Police an tlem chunga hna an thawk tha viau nia a hriat thu a sawi a. Tunah hian Serchhip District-ah Constable post ruak 26 lai a awm thu leh Officer erawh an awm that thu a sawi a. Nikum kumtir ah Serchhip in hun pawimawh tak leh khawmpui lian te thlenga hri in a tibuai zui chung leh Village Council inthlanna te neih a ni chunga Police ten thahnem ngai taka hna an thawk chu lawmawm a tih thu a sawi bawk.
Serchhip District Addl SP chuan kum hnih kalta, kum 2019 leh 2020 chhunga Dan bawhchhia an man dan leh Court lama an umzui dan tarlangin, Serchhip District chhungah Police Station pathum (3) awmin kum 2019 chhunga thubuai ziahluh zawng zawng 100 a nih laiin nikum (2020)- ah thubuai 83 ziahluh a ni a, kum hmasa aiin nikum ah thubuai ziahluh hi 17 laiin a tlem a, kum 2019-ah khan thubuai ziahluh 100 zingah Chargesheet 97 thehluh niin thubuai pathum erawh chu Final Report thehluh a ni a, Convict mi 53 awmin, Discharge 4 leh Pending Trial 40 a awm bawk a ni.
Nikum chhunga thubuai ziahluh 83 zingah chargesheet thehluh 64 awmin Final Report thehluh pakhat a awm a, Pending Investigation 18 awmin Convict 25, Discharge 1 leh Pending Trial 38 a awm bawk a ni.
Kum 2019-ah khan thubuai ziahluh zingah Zu khapna Dan, MLP Act bawhchhia niin 23 register a ni a, a dawtah mi rawk (Burglary) niin thubuai 21 ziahluh a ni a, rukruk thubuai 20 ziahluh a ni bawk. Nikum-ah rukruk (theft) thubuai ziah-luh tam berin thubuai 24 ziahluh a ni a, a dawtah mi rawk (burglary) niin thubuai 12 ziahluh a ni a, MLP Act kaihhhnawih ah thubuai 11 ziahluh a ni bawk. Protection of Children from Sexual Offences (POCSO) Act, hnuaiah kum 2019 chhungin case 4 register a ni a, kum 2020 ah case 6 ziahluh a ni bawk.
Kum hnih kalta chhung khan Serchhip District chhungah tualthah leh tualthah tum thubuai ziahluh a awm lova, nikum hmasa ah pawngsual thubuai 5 lai ziahluh a nih laiin nikum-ah ziahluh a awmlo bawk a, nikum chhung khan lirthei chet-sualna mihring nunna channa tum 2 leh nunna chan awmlohna pakhat ziahluh niin IPC Section 188-na hnuaiah thubuai ziahluh a awmlo bawk.
Serchhip District-ah hian nikum chhung khan Foreigner Case in mi pakhat man a ni a, ND&PS Act hnuaiah thubuai 5 ziahluh niin IT Act hnuaiah thubuai pakhat ziahluh a awm bawk.
Vawiin-a he hun hmanna ah hian Serchhip District chhunga Police Officer te telin chawhma lamah Serchhip District Information & Public Relations Officer, K. Saitluanga MIS chuan Police te leh mipuite thawhhona chungchang ah kalkhawmte hi zirtirna leh fuihna thu a sawi a, District Legal Services Authority atangin JH. Lalparmawii MJS chuan Court lama thubuai umzuina tura hriattur pawimawh hrang hrang te sawiin, chawhnu lamah Serchhip SDPO, Kaste Romalsawma hovin kum kaltaa an hmalakna thlirletna neih a ni a, Police Branch hrang hranga mawhphurtu Officer ten an enkawl Branch Report pein sawihona an nei zui a ni bawk.

Comments

Chhiar Hlawhte