Latest News

Ruihhlo hmansual tirem turin mipuite kan tanrual a tul

 Ruihhlo hmansual tirem turin mipuite kan tanrual a tul

Serchhip-a Excise & Narcotics Department te chuan niminpiah chawhnu lam khan Serchhip khawpui chhungah ruihhlo, Heroin No. 4 tam tham tak mai an man a, a neitu nia hriat pawh man nghal niin hetianga kan khawpui chhunga ruihhlo man tur ala awm reng hi a pawi hle mai a. Heng ruihhlo te hi kan thalai te nun tichhetu a nih avangin mitin te hian a dona kawngah theihtawp kan chhuah tlan a tul hle mai a, hetiang ruihhlo hian kan thalaite a tihchhiat zel chuan kan Hnam tan pawh hmalam hun a eng lo thei hle dawn a ni tih i hre reng ang u.

Kum 2000 hmalam vel khan Mizoram hian Proxyvon kan lo buaipui viau tawh a, kan khua ah ngei pawh a ngawlvei tam tak an lo awm tawh a, amaherawh chu sawrkar leh kan tlawmngai pawl, a bikin YMA te hmalakna avangin hun reilote ah heng ruihhlo hi thunun in a hmangsual pawh an awm zui ta lo a. Tuna kan thalaite zinga Heroin No. 4 hmangsual an tam chho leh ta viau hi a pawi hle mai a, kan sawrkar bakah YMA ten tihrem tumin nasa takin hma an la a, mipuite pawh hian a theih anga kan tawiawm a tul hle a ni.

Mizote hi Hnam tlem te kan la ni a, chutihlaia kan thalai, nakin lawk-a kan ram leh hnam la kaihruai thei tur te ruihhlo bawih an an tang zel a nih chuan he hnam hmalam hun atan hian ala pawi thei hle dawn a. Hei vang hian mipui ten sawrkar leh tlawmngai pawl anga hma kan lakna mai bakah hian pawl hrang hrang leh Kohhran lam te pawh hian hetiang ruihhlo laka kan thalai te an him theihna tur atan leh a lo ti tawh te pawhin an sim theihna tur hian kan tantlan hi a tul tak meuh meuh a ni.

Comments

Popular News (Last 30 Days)