Serchhip District-ah COVID-19 Vaccine la pe dawnlo

Tunkar Inrinni khian India ramah COVID-19 Vaccine pek tan tum ni mahse Serchhip District-ah erawh hri danna pek hun tur hi hriat ala ni lova, hri danna pe turin inbuatsaihna erawh peihfel thawhkhat a ni tawh thung.

Serchhip District Chief Medical Officer, Dr. Laldawngliana Sailo hnen atanga thu kan dawn danin COVID-19 hri danna hi tunkar Inrinni, January 16 khian India rampum-ah pek tan tum a ni a, Mizoram-ah chuan Aizawl khawpui chhung hmun thum leh Lunglei-ah hmun khat ah te hri danna hi pek tum a ni a, heng bak hmundang ah erawh chuan karleh lamah hri danna hi pekchhuah beisei a ni thung.

Serchhip CMO chuan an Office kal-tlangin tunah hian a thawhkhatna a hri danna pek tur mi 1198 te hming thehluh tawh a nih thu a sawi a, amaherawh chu Assam Rifles leh BSF atanga Frontline Worker te chu anmahni in list an thehluh ve avang leh an hnenah list an la thehluh loh avangin Serchhip District atanga hming pekluh zawng zawng erawh hriatchian theih ala nih loh thu a sawi a. Serchhip District-a hri danna pekna tur hian Serchhip khawpui chhungah hmun thum (3) leh District chhunga CHC pakhat leh PHC panga (5) te ruahman a nih tawh thu a sawi a, hri danna petu tur training pek erawh zawhfel ala nih loh thu sawiin, hei hi Staff thenkhat Department atanga training dang nei a koh te an awm vang a nih thu a sawi a, hun reilote ah training hi chu zawhfel theih beisei a nih thu a sawi bawk. Serchhip CMO chuan hri danna pek hmasak tur zingah hian Village Level Task Force (VLTF) aiawhte an la telloh thu a sawi bawk.