Latest News

Mizoram-ah PMKVY 3.0 tlangzarh a ni

Nimin khan Labour, Employment, Skill Development & Entrepreneurship Department Special Secretary, Dr. Lalzirmawia Chhangte hovin LESDE Department Office, Aizawl-ah 'PMKVY 3.0' tlangzarhna neih a ni.

Pradhan Mantri Kaushal Vikas Yojana (PMKVY) hi Ministry of Skill Development and Entrepreneurship, Govt. of India flagship program a ni a. He scheme hmang hian Industry hrang hrangten an mamawh skill (thiamna) ah thalaite training tir niin, thalai tam takin he Scheme hmang hian hna an lo hmu tawh a ni.

Pradhan Mantri Kaushal Vikas Yojana 1.0 (2015-2016) chu kum 2015 khan tan a ni a, Ministry of Skill Development and Entrepreneurship, Govt. of India hnuaia NSDC (National Skill Development Corporation) hmalakna niin PMKVY 1.0 hmang hian kum khat chhungin thalai nuai 19.85 vel skill training pek an ni. PMKVY 1.0 hi a hlawhtlin em avangin PMKVY 2.0 chu kum 2016-2020 chhunga thalai tam zawk training pek nan July 15, 2016 khan tan leh niin PMKVY 2.0 hi chu Central leh State sawrkar hmalakna a ni a, 75% hi central kutah a awm laiin 25% chu state kutah a awm a, he scheme hmang hian thalai nuai 94.17 vel nikum June 20 thleng khan training tir an ni leh a, heng nuai 94.17 zingah hian Mizoram sawrkar hnuaia LESDE Department-in Mizoram thalai a training tir zat chu 8460 niin hna hmu zat chu 5388 an ni a, nikum March 31 khan a tawp a ni.

He scheme hnuaia Training chhuakte chu National Trade Certificate pek an ni a, he Certificate hmang hian India ram hmun hrang hrang ah Mizoram thalaiten hna chi hrang hrang an thawk mek a. Amaherawh chu COVID-19 hripui vanga mahni hna thawk chhunzawm thei lo (Migrant Workmen) te pualin kumkhat pawhsei (extend) a ni.

PMKVY 2.0 hnuaia thalaite skill training chungchanga hmalakna chu chak lehzuala chhunzawm a nih theih nan PMKVY 3.0 chu ruahman leh niin Phase hniha kalpui tur a ni a, Phase khatna chu 2020-2021 chhunga kalpui tur niin Phase hnihna chu 2021-2026 chhunga hmalak tur a ni thung a, PMKVY 2.0 zulzuiin central sawrkarin-in 75% a chang ang a; state sawrkarin 25% a chang thung ang. PMKVY 3.0 danglamna chu District Skill Committee(DSC) rawtna te a pawimawh dawn a, a theih chin chinah DSC-in rawtna a siam angin kalpui tur a ni. PMKVY Scheme hi CSS ah chuan 100% central funding a ni a. Labour, Employment, Skill Development & Entrepreneurship Department chuan theihtawp chhuaha hman tangkai a tum a. Tunah hian PMKVY Scheme-ah hian Mizoram hi mipui tam lama tehin India ram State titha ber pawl nihna an la hauh a ni.

Comments

Chhiar Hlawhte