Latest News

Mizoram Governor in B. Sangkhumi lawmpuina hlan

India rama Civil mite chawimawina sang, Padma Shree Award dawng tura thlan, B. Sangkhumi chu Mizoram Larsap, P.S. Sreedharan Pillai chuan nimin khan Raj Bhavan-a leng-ah sawmin lawmpuina thuziak a hlan.

January 25, 2021 khan India President chuan kumin a India rama Civil mite chawimawina sang, Padma Award dawng tur hi puangin kumin hian mi 119 te hnenah Padma Award hi hlan tur a ni dawn a, Civil mite chawimawina sang ber, ‘Bharat Ratna’ dawng tur an awm lova, Padma Vibhushan dawng tur mi 7 awmin Padma Bhushan dawng tur mi 10 an awm a, Padma Shri dawng tur mi 102 an awm bawk a, Padma Shri dawng tura puan zingah hian khawtlang rawngbawlna, a bikin hmeichhia te chawikanna leh hmeichhe rahbi tleu te dinhmun siamthat kawnga a thawh hlawk avangin MHIP General Hqrs. President hlui leh MPSC Chairperson hlui B. Sangkhumi pawh a tel a ni.

Governor P.S Sreedharan Pillai chuan mahni chhungkaw enkawlna piah lama midangte thatna tura vantlang tana theihtawp chhuah thin, mi tlawmngai fal te baka chawimawi phu an awm lo tih a sawi a. Vantlang tana rawngbawl hna hi Pathian tana rawngbawlna a ni, a ti a. B. Sangkhumi leh a thiante hnathawh leh Mizo Hmeichhiate dinhmun chawikanna kawnga an thawhrimna te a then a zar chiah a hre nachungin an ngaihsan awm a tih thu a sawi a. Hetianga hnathawk tha, India Sawrkarin a chawimawina sang a hlan tlak, Mizo hmeichhia zingah kan nei leh chu inchhuanna tham a ni, tiin Mizo hmeichhe zawng zawng tan entawn tlak leh chona petu a nih ngei a beisei thu a sawi bawk.

He hunah hian B. Sangkhumi pawhin Governor hnenah hian vantlang rawngbawlna avang leh a hnathawh hrim hrimah India Sawrkar chawimawina dawn a beisei ngai loh thu leh hetiang dinhmun a lo thleng ta chu Pathian leh a thawhpui te vang a nih thu a sawi a. Mizo khawtlang nuna Hmeichhia te dinhmun chhe thin lutuk siamthat nan an phak ang tawk tawkah theihtawp an chhuah thin thu te, a chang phei chuan hmeichhe chunga hleilenna thleng an dona kawngah te mi nuihsawh leh deu te pawh an tawh fo thu te a sawi a. Beidawng lova an beih chhunzawmna te Pathian in mal a sawm a, tunah chuan rochun tur chungchangah te, inneih chungchangah leh kawng dang dangah te duhthusam la ni lo mahse Mizo Hmeichhia te dinhmun a lo zia chho zel a, a lawmawm takzet tih a sawi bawk.

B. Sangkhumi hi Sawrkar hnathawk pension tawh a ni a, Director, Higher & Technical Education a thawh laiin MPSC Member atan lakluh a ni a, MPSC-ah hian kum 9 thawkin Chairperson nihna te pawh a chelh tawh a. Vantlang rawngbawlna lamah MHIP hruaitu ni thinin MHIP General Hqrs. President hna pawh a lo chelh tawh a ni. 

Comments

Chhiar Hlawhte