AIF leh DIDF chungchang inhrilhhriatna neih a ni

Agriculture Infrastructure Fund (AIF) leh Dairy Processing & Infrastructure Development Fund (DIDF) chungchang hmelhriattirna leh inhrilhhriatna Sensitisation Meeting chu nimin khan Agriculture Minister, C Lalrinsanga hovin neih a ni.

    NABARD hnuaia Fund pahnih kaltlanga loneih leh bawnghnute sawngbawlna kawnga hmalakna tur, AIF leh DIDF chungchang hmelhriattirna leh inhrilhhriatna hun RCS Meeting Hall, Babutlang-a neih ah hian Agriculture Minister, C. Lalrinsanga chuan Sawrkar Laipuiin loneih lamah hmasawnna a awm theih nan kalphung thar a duang chho mek tih sawiin, chung zingah AIF chu thil thar, lonei mi ten an tangkaipui ngei theihna tur ruahmanna nia a hriat thu a sawi a. AIF in loneih bakah ranvulh te pawh khaikhawma kalkawp tir (Convergence Mode)-a kalpui chu a tum lian tak nia a hriat thu a sawi a. NABARD tanpuina in loneih leh ranvulh lamah hmasawnna tur tam tak a awm a, mahse heng ruahmanna hi duh angin kan la hmelhriat lova, a bik takin tharchhuah sawngbawl leh a kaihhnawih atana loan NABARD in an buaipui AIF te hi thil thar anih avangin hmelhriat leh hriatchian a ngai a ni, a ti.

Agriculture Infrastructure Fund (AIF) atan hian Sawrkar Laipuiin rampum tan cheng vbc. nuai khat a ruahman a, kum 2021 atanga 2030 thlengin he ruahmanna hi kalpui tur a ni a. Heng loan te hi kum 2024 thlenga pek zawh tur niin Mizoram tana pek theih zat chu cheng vbc. 196 niin NABARD hotuten an sawi.