Mizoram-ah Road Safety Month hman a ni dawn

Mizoram State Road Safety Council chu nimin khan an Chairman, Transport Minister TJ. Lalnuntluanga hova thukhawmin January ni 18, 2021 - February ni 17, 2021 inkarah Road Safety Month hman ve nise an ti.

Transport Directorate Conference Hall-a he thutkhawm ah hian Transport Minister, TJ. Lalnuntluanga chuan kum dangah chuan January thla-ah ‘Road Safety Week’ hman thin a nih thu sawiin, kuminah erawh chuan sawrkar laipui-a Road Transport & Highways chuan thla khat daih, ‘Road Safety Month’ chu January ni 18, 2021 - February ni 17, 2021 inkara hman turin ruahmanna a rawn siam thu a sawi a. India ramah kumtin mi 1,50,000 vel lirthei chetsualna avangin an boral ziah anga chhut a ni tih sawiin, lirthei chetsualna avang hian mihring nunna hlu tak kan chan thin bakah, ramtuileilo-in mi tam tak an awm a, chhungkaw tam takin eizawnna thlengin harsatna an tawh phah thin a, Mizoram-ah pawh lirthei a pung chak em em a, hetihlai hian lirthei khalhtu, lirthei neitute leh mipuiten fimkhurna tur leh zawm tur kan neihte kan hriatchian a tul hle a, Road Safety Month hman chhung hian nasa lehzuala inzirtirna kalpui a tul takzet a ni, a ti.

Nimin-a thukhawm chuan sawrkar laipui ruahmanna zawmin January ni 18, 2021 - February ni 17, 2021 inkarah Road Safety Month hman ve nise an ti a, Road Safety Month hawnna inkhawm chu District Headquarters zawng zawngah huaihawt tur a ni ang. Mipuite tanpui nan leh an hriat duh zawngte hrilhhriatna tur Help & Guidance Desk siam tum a ni a, Transport Department leh Traffic Police tangkawpin District khawpui zawng zawnga hmun lun laiah Help & Guidance Desk hi an buatsaih ang. Mipuite fimkhur tura zirtirna atan Road Safety Banner chu District khawpui kawtchhuah leh kawtthler hmun hrang hrangah tar a ni ang a, lirthei zuartuten an dawr-ah an tar bawk anga. Zirna In hawn a nih hunah lirthei laka fimkhur tura intiamna, Road Safety Pledge chham tur a ni anga, sawrkar Pisa zawng zawngah pawh chham tur a ni ang.

Hei bakah hian Local Council leh Village Council ten an huamchhung ah Road Safety Month hman chhung hian vantlang aurinna hmangin mipuite fimkhur tura hriattirna thuchah tawi an puang thin ang a, mipuite hnenah sem tur, Road Safety Pamphlet leh Leaflet siam a ni bawk ang. Insurance Company leh Pollution Control Board ten Insurance pawimawhna leh Pollution chungchanga mipuite hriattur pawimawh an buatsaih chu mipuite hnenah sem chhuah a ni bawk anga. Transport Minister in Road Safety Month thuchah a sawi leh lirthei chetsualna laka mipuite himna tur leh hemi chungchanga zawm tur pawimawh chi hrang hrang inhrilhfiahna, Road Safety Talk Show pawh buatsaih tum a ni bawk.