Hri kai thar leh enkawl dam 3 ve ve awm leh

Niminpiah-a Mizoram-a Sample enfiah atangin COVID-19 hri kai mi pathum hmuh leh an ni.

    Heng hri kai hmuhchhuah thar te hi ZMC Laboratory-a Sample enfiah 255 atanga hri kai hmuhchhuah niin an zinga pahnih hi tunhnaia Mizoram pawn atanga rawn lut an ni a, midang pakhat hi BSF sipai, taksa-a natna lanchhuahna a neih avanga ZMC-a enkawllai a ni thung. Niminpiah khan District hrang hranga TrueNat Laboratory-ah Sample 68 enfiah niin hri kai hmuhchhuah an awm lova, Rapid Antigen Test hmanga Sample 351 enfiah ah hri kai hmuchhuah an awmlo bawk.

Heti hian nimin thleng khan Mizoram-ah Sample 2,03,259 enfiah ni tawhin heng atang hian hri kai 4359 hmuhchhuah an ni tawh a, Sample enfiah zawng zawng atanga za zela 2.14 te chuan hri hi an kai a ni. Nimin khan Mizoram-a hri kai enkawl mi 3 te chu anmahni enkawlna hmun atanga chhuahtir leh niin heti hian nimin tlai dar 5:00 thleng khan Mizoram-a hri kai hmuhchhuah zinga 4306 te chu enkawl dam an ni tawh a, hri kai hmuhchhuah atanga za zela 98.78 te chu enkawl dam ni tawhin hri kai enkawllai 44 an la awm a, hri kai zingah nunna chan mi 9 an awm tawh bawk a ni.