DIPRO in MJA (SD) member te Kumthar thingpui a inpui

Serchhip District Information & Public Relation Officer, K. Saitluanga chuan nimin khan MJA Serchhip District Member te a Pisa-a leng-ah sawmin Kumthar thingpui in hona an nei.

Serchhip DIPRO Office-a he hun hmanna ah hian Serchhip DIPRO chuan MJA member te chu Kumthar chibai bukin, sawrkar in thuthar thehdarhtute an damloh leh thihna hial an tawh ah pawh chhawmdawlna te buatsaih sakin, kum kalta chhunga Serchhip District chhunga thuthar thehdarhtute zingah hetianga chhawmdawlna pek ngai an awmlo leh nunna chan an awmlo chu lawmawm a tih thu a sawi a ni.

Serchhip DIPRO chuan kum kalta chhungin hripui avanga buaina karah thuthar thehdarhtu ten fak tlakin sawrkar an thawhpui nia a hriat thu sawiin, lawmthu a hrilh a. Kumthar ah pawh thawhhona tha tak an neih chhunzawm zel a beisei thu a sawi a. Kum kalta chhungin Ser-chhip-a I&PR Department chuan Press Release 368 an siam thu sawiin, heng zinga a tam ber chu COVID-19 hri leng kaihhnawih a nih thu leh heng an Press Release siam te Newspaper leh Electronic Media ten kim taka an puanchhuah sak nia a hriat thu sawiin, lawmawm a tih thu leh hri hian an thawhhona that zia a tifiah nia a hriat thu a sawi bawk.

He hunah hian MJA Serchhip District President, Kapliana Pachuau pawhin I&PR Department chu nu leh pa anga an en thu sawiin, a tul ang zela thawhpui an inpeih reng thu a sawi a. Social Media-a thu leng vak tam tak awm thin ah Journalist te chu an tan ve zel a tul thu sawiin, thudik zawnna kawngah taihmak an chhuah zel a pawimawh thu a sawi bawk.

Nimin a inkawmna hun ah hian MJA (SD) member dang te pawhin an ngaih pawimawh zawng te sawiin, inkawmna hun tha tak an hmang a, he hunah hian Serchhip tualchhung-a thuthar thehdarh hna thawktute an tel tha hle a ni.