Dan in a phal chinah a theih anga hnaiah ZPM Party kan thawhpui zel dawn - ZLP

ZPM Legislature Party hruaitute chuan Serchhip bial-a by-election lo awm turah Serchhip bial mipuite chu fim taka ngaihtuahna hmang zel turin an ngen tih an sawi a, Dan in a phal chinah a theih anga hnaiah ZPM Party chu an thawhpui zel dawn tih an sawi.

Mizoram Legislative Assembly-a ZPM Legislature Party (ZLP) hruaitute hian nimin khan Serchhip rawn tlawhin Serchhip Press Club-ah thuthar thehdarhtute an kawm a, he hunah hian ZLP Leader, Vanlalhlana chuan ZPM Legislature Party (ZLP) Leader leh Serchhip bialtu MLA, Lalduhoma chu hripui leng karah MLA atanga ban a nih tak avanga by-election buatsaih a ngai ta chu pawi an tih thu leh Serchhip bialtu MLA atana amah thlangtlingtu mipuite duhthlanna an zahin an lainat hle tih an sawi a. Lalduhoma chu Mizoram hmasawnna atana Mizoram sawrkar khalh ngil tura a thiamna, finna leh a hun leh tha tam tak sengtu a nihna chu fakawm an tih thu a sawi a. ZLP member te chuan an Leader anga la en rengin, amah rawn chung zelin kan ram tan nghet taka dingin an thawk zel dawn tih an sawi.

ZLP Leader chuan Lalduhoma chuan a bial a hmangaih tih sawiin, Serchhip bial chhungah hmasawnna hrang hrang a thlen theih nan sawrkar Department hrang hrangte dawr kualin chak takin hma a la tih a sawi a, tunhnaia Serchhip bial chhunga hmasawnna hrang hrang lo thleng mek te chu bial chhung tana hma a lo lakna rah a ni tih sawiin,  sawrkar sum dik tak leh tha taka hman a nih theihna turin ram rorelna ah Opposition chak tak neih a ngai tih a sawi a. “Mizoram sawrkar khalhngil tura thawh hlawk ber, Pu Lalduhoma, MLA atanga paihthlak a ni hi pawi kan ti hle a. Zoram mipuiah sawrkar hian ‘Opposition chak neih hi a hlau em ni’ tih zawhna pawh a lian hle a ni,” a ti a. “Kan ram ah rorelna tha a awm theih nana Mizoram Legislative Assembly rorelna ah Pu Lalduhoma a thut leh ngei theihna turin Serchhip bial mipuite in Vote hlu tak Pu Duhoma tana hlan turin in khawngaihna kan rawn dil e,” a ti bawk

Vanlalhlana chuan sum leh therhlo dang hmanga kan Vote hlu tak in leisak tumna chu mihring inzahlohna lian tak a ni tih sawiin, Serchhip bial mipuite chu fim taka ngaihtuahna hmang zel turin a ngen a, “Ngaihtuahna fim hmang theilo ang maia min ngaitu, hmusit leh diriam taka kan vote hlu tak lei tumtu politician te hi kan ram tichhetu an ni tih hria huai taka lo hnawl ngam turin ka ngen che u a ni,” a ti bawk.

Thuthar thehdarhtute zawhna chhangin ZLP member te chuan ZPM Party-ah an inngai tih an sawi a, Party-ah erawh nihna an neihloh thu an sawi a, MLA atanga ban a nih hnuah Lalduhoma’n Court-ah kal a tum thu a sawi chunga Court lama a kal leh tak loh chungchanga zawhna chhangin, Mipui Court-a kal chu mimal duhdan ni lovin Party in ngun taka a ngaihtuah hnua pawl duhdan a nih thu an sawi a, Serchhip-ah rawn kalin mi hrang hrang an kawm thu leh Toll Free te siama ngaihdan an lak hnuah Mipui Court-a kal tura ngaihdan an siam thu an sawi.

Serchhip bial-a by-election lo awm turah Lalduhoma chu ZPM Ticket-a a din dawn thu sawiin, thlantlin a nih chuan Legislature Party pakhat-ah an awm ho leh dawn thu leh an Leader a nih leh dawn thu an sawi a. MLA atanga bân a nih theih nana Lalduhoma hêktute pawh an khawngaih hle tih sawiin, an hêktute pawhin hrehawm an ti a, mahse nawrtu an awm avangin an ti lo ngam si lo niin an sawi a, Serchhip-a Lalduhoma thlantlin leh a nih chuan Serchhip bial chu inthlan leha Chief Minister bial tur chiang sa niin an sawi bawk.

Nimin-a thuthar thehdarhtute an kawmna hunah hian ZLP member MLA 6 te an tel kim thei a ni.