Latest News

Chanchin thar thenkhat :

Tri Services Veterans Day

Mizoram-ah a tum khatna atan ‘Tri Services Veterans Day’ chu nimin khan hman a ni a, Home Minister Lalchamliana chuan a hmanpui a ni. Kum 2017 atang khan rampumah he Ni hi khaw-mual, Lawng leh Thlawhna sipai pension Veterans te pualin hman a ni a, Mizoram-ah chuan nimin khan Chawlhhmun-a Mizoram Home Guards & Civil Defence hmunpui-ah hman niin Home Minister chuan Mizoram hruai hnaa sipai bang, Veteran ten kawng tinrengin an lo pawi-mawh thin  thu te, an thlahte pawh Mizoram khaw-tlangah dinhmun pawimawh tak tak luahin kawng hrangin Mizoram khawtlang leh Society tan an thawhhlawk hle nia a hriat thu te a sawi a ni. Mizoram Ex-Servicemen League (MESL) ah hian member 6515 vel an awm mek a ni.


Bank te hmalakna thlirlet

Nimin khan Lunglei-ah District Consultative Committee/District Level Review Committee/District Level Security Committee thutkhawm neiin nikum September Quarter tawp thlenga an District chhunga Bank hrang hrangte hmalak dan an thlirlet a, Bank hrang hrang ten Bank Security an neih bakah CCTV, Fire Extinguisher, Alarm System leh Police Patrol Log Book te dahin an enkawl that thu tarlan a ni a, ATM Booth tinah Hand Sanitizer dah theuh tur tih niin Currency Management- Remittance issues leh pawisa chhia thleng chungchang ah Bank ah harsatna a awm loh thu tarlan a ni bawk. He hunah hian nikum September thla tawp thleng Quarter-a CD Ratio chu 47.06 a nih thu leh National Benchmark 60 % pha tura tan lak a tul thu he hunah hian tarlan a ni bawk.


Lawmman dawn lawmna nei

Mizoram sawrkar-a School Education Department-in 65th National School Games Boxing U-17 Boys a thlen ah Best Organisation Award 2nd position a dawn lawmna chu nimin khan Education Minister, Lalchhandama Ralte hovin a pisa-ah neih a ni.


School te la khar rih dawn

State Executive Committee on Disaster Management thuchhuak angin nimin khan Directorate of School Education Department chuan thuchhuah siamin thu leh awm hma chu School zawng zawngah classroom zirtirna kalpui rihloh tur a nih thu leh Hostel pawh la khar chhun-zawm zel tur a ni tih a tarlang a. Hetihlai hian State Executive Committee thuchhuak angin  Officer leh Staff, COVID-19 Executive Duty a thawkchhuak te chu an thawhna Department-ah theuh an hna pangngai thawk leh tawh turin chhuah an ni thung.


R-Day hman dan tur rel

Tun thla ni 26-a India Republic Day lo thleng tur Thenzawl-a hman dan tur nimin khan sawi-hona neih a ni. He sawihona Thenzawl SDO (C), Kulothungan A, IAS hova SDO (Civil) Conference Hall-a neih ah hian hri leng avangin kumdang angin kumin hian Republic Day lawm theih ni dawnlo mah se a remchang anga lawm nise an ti a, January 26, 2021 chawhma dar 11:00-ah SDO (Civil) Office tual-ah hun hman tura tih niin khuallian atan Thenzawl SDO (Civil) chu ruat a ni bawk.

Comments

Chhiar Hlawhte