Latest News

Hri leng avanga inkhuahkhirhna thlahdul hretin inkaihhruaina thar tichhuaka hman nghal a ni

COVID-19 hri leng avanga Mizoram-a inkhuahkhirhna kalpui mek chu thlahdul mek zel niin Mizoram sawrkar chuan Inrinni kalta, January 16, 2021 atanga hman tan turin inkaihhruaina thar a tichhuak leh a, Zan lama Curfew hun chu tihtawi niin Pathianni chhun lamah inkhawm theih turin ruahmanna siam a ni ta bawk.

Hemi chungchanga Mizoram State Disaster Management Authority-a State Executive Chairman leh Mizoram Chief Secretary ni bawk in Inrinni atanga hman nghal tura thupek a tihchhuah ah hri leng avanga inkaihhruaina thlahdul deuh te hi tarlan a ni a. He thupek a tarlan a nih danin India ram hmundang atanga Mizoram-a 1o lut reng reng chu Entry Point-ah uluk taka Screening kalpui chhunzawm zel tur niin inkhunghranna tur hmun ruat ah te inkhunghran tur a ni anga, amaherawh chu hei hian RT-PCR/CBNAT/TrueNAT hmanga COVID-19 Test Negative Certificate, Mizoram an rawn luh hma darkar 96 (ni 4) aia hlui lo nei te chu a huam tawh dawnlo thung a. Mizoram atanga zinchhuak zingah darkar 96 chhunga rawn let leh te chu Entry Point-ah uluk taka Screening neih bakah Rapid Antigen Test neiin, RAgT test-a Negative leh symptom neilo te chu inkhunghran an ngai tawh dawnlo bawk a, fimkhur takin Self-Monitoring tih tur a ni thung ang.

Mipui vantlang tana inkhuahkhirhna chungchang tih danglam zingah District Headquarters-ah Zan lama pawn chhuah khap hun chu tihtawi niin zan dar 8:30 leh zing dar 4:30 inkarah pawn chhuah khap a ni tawh dawn a, Mizoram pawn atanga lo lut, Quarantine paltlang lo mikhualte tumahin thlen phal a ni lova, hei hian Mizoram chhunga awmsa te in mikhual tawn a huam lo thung ang.

Zirna In hawn chungchangah School leh Hostel te chu Class-X leh XII Board Exam tur tan January 22, 2021 atangin School Education Department-in ruahmanna a siam angin hawn theih a ni anga, Hostel-a lut tur reng reng chuan Hostel an luh hma darkar 96-ah RAgT Negative Certificate neih vek tur a ni ang. Undergraduate leh Post Graduat zirlaite tan February, 2021 atangin a tahtawlin zirna hawn theih a ni dawn a, Training/Coaching Institutions te chu an hmun-hma a leng zat 50% in emaw, mi 50 aia tam lo in Social Distancing zawm chungin hawn theih a ni anga, a dang zawngah chuan Online hmangin zirtirna kalpui chhunzawm a ni ang.

Sakhaw Biak Inkhawm chungchangah a hmuna leng zat zaa 50 aia tam lovin February 1, 2021 atangin punkhawm theih a ni anga, amaherawh chu mipui pungkhawm hi 200 aiin an tam tur a ni lova, hei hian chhunlam inkhawm chauh huamin zan lama inkhawm erawh khap a ni a, zing tawngtai inkhawm chu mi 50 aia tam lovin kalpui a ni ang.

Mitthi vuina leh inneihna (man hlan, inneih inkhawm leh reception)-ah a hmun-a leng zat 50% aia tam lovin a punkhawm theih a ni anga, amaherawh chu mi 100 aia tam punkhawm phal a ni lo thung a, hetah hian Programme hlawhtlinna atana thawk zawng zawng chhiar tel an ni anga, heng hmunah te hian Zai khap niin mitthi vuina a kal ten mask vuah vek tur a ni bawk.

Cinema Hall, Auditorium, Community Hall leh intawllenna hmun dangah te pun-khawmna tur hmun (Indoor)-a leng zat 50% aia tam lovin a punkhawm theih anga; amaherawh chu, mipui pungkhawm hi mi 50 aiin an tam tur a ni lo. Pawn lama punkhawmna (Outdoor)-ah erawh mi 100 thleng phal a ni a, hei hian pawl thil-a punkhawm pawh huamin loh theihloh leh tul bik thilah chuan Deputy Commissioner ten mi 150 thleng phalna an pe thei ang.

Heng bakah hian sumdawnna hmun te chu tlai dar 5:30 hmain khar vek tur a ni tawh dawn a, Commercial Passenger Vehicles te an tlan phalsak niin Driver, Handymen leh Conductor te chu Rapid Antigen Test vek tura hmalak a ni bawk ang.

Comments

Chhiar Hlawhte