Serchhip-ah buhfai a rawn thlen belh mek zel

Serchhip-a Supply Department hotute chuan Serchhip-ah buhfai a rawn thlen belh mek tih sawiin, January thla quota tur pawh rawn sanction a nih tawh thu an sawi.

Tunhnaia Serchhip Supply Kudam-a buhfai chhekkhawl a tlem chungchanga hmalakna kal zel kan Palai in a zawhna chhangin Supply Department hotute chuan December thla quota pek tur daihloh hlek phurhrukna tura Quintal 300 rawn pekchhuah chu rawn thleng tawhin Retailer te hnenah pekchhuah vek a ni tawh a, Retailer te pawhin mipuite hnenah an semchhuak leh mek tih an sawi a, hei bakah hian January thla quota tur atan quintal 2900 rawn thawn leh tura tihfel a nih tawh thu leh hemi atanga quintal 1285.23 chu niminpiah khan Bualpui FCI Kudam atanga rawn pekchhuah a nih tawh thu an sawi a, a bak quintal 900 chu Zuangtui Kudam atanga rawn pekchhuah leh tur niin hemi bak la awm te pawh Bualpui FCI Kudam atanga rawn pekchhuah leh tur a nih thu an sawi.

Supply Department hotute chuan Serchhip DCSO hnuaiah hian thla khat-ah Ration buhfai quintal 2300 vel mamawh a ni tih sawiin, tuna rawn pekchhuah tura ruahman hi a rawn thlen thuai beisei a nih avangin January thla quota tur pawh hi pekchhuah nghal theih a nih tur thu an sawi a, hmun hla deuh zawk, Cherhlun Centre-ah chuan January thla quota tur hi pekchhuah fel a nih tawh thu an sawi a, mipuite tan buhfai-ah thlaphanna tur a awmloh thu an sawi. Hei bakah hian sawrkar laipui ruahmanna anga hri leng avanga BPL leh AAY te hnena PMGKAY hnuaia Ration buhfai a thlawna sem pawh tunah chuan pekchhuah fel a nih tawh thu an sawi bawk a ni.