Sports Complex-a Synthetic Running Track siam hna January-ah zawh hman beisei a ni

Serchhip Sports Complex-a Synthetic Running Track siam hna thawh mek chu thla khat chhung vela zawh hman tawh beisei a ni.

Serchhip Hmar Veng-a Sports Complex siam mek a Synthetic Running Track siam hna hi Syncot International chuan thawk mekin COVID-19 hri leng avanga hun engemaw chen hna chawlh lailawk a nih hnuah October 27, 2020 khan hna hi thawh tan leh a ni a, Syncot International-a thawktute chuan Running Track an siam hi Rubber thuah thum a nih tur thu sawiin, tunah hian Rubber nawi, a thuah hnuai ber chu phah zawh ni tawhin, hemi chhungah hian tui a luhlohna turin solution chi khat, rawng sen chu an hnawih leh mek tih an sawi a, he hna hi an zawh hunah a thuah chung ber leh a tawpna tur chu phah chhunzawm ani dawn tih an sawi a ni.

Helai hmuna hnathawh viltute chuan tluang taka hna an thawh chhunzawm theih chuan nakum January thla chhunga zawh hman an in beisei tih an sawi a, tunah hian an hmanraw mamawh tur engkim an chhekkhawl tawh tih sawiin, Synthetic Running Track thuah chung ber phah tur hian Delhi atanga a phah thiam bik an rawn kal dawn thu sawiin, hri leng avanga sawrkar in inkhunghranna Dan a siam te zawm a tul dawn avangin tlemin an zawh har phah hlek tur thu an sawi a ni.

Helai hmuna hnathawktute chuan an hnathawh laia lo kal leh lo tlawh an awm thin avanga harsatna an tawh thu pawh sawiin, helai hmun hi tlawh an awm ve fo thu leh a bikin, thla la tura kal chu Pathianni-ah an tam thin thu an sawi a, heng mite hian an hnathawh sa an lo tihchhiat chang a awm thin thu sawiin, hei vang hian UD&PA Department leh a awmna Village Council te pawhin helai hmun tlawh an khap rih thu an sawi a. Amaherawh chu Veng hla tak tak atanga rawn kal te an awm reng thin thu leh kan hma lawkah hunpui a lo thlen dawn avangin an hna thawh mek hi tha taka an zawhfel vat theihna turin tumah in helai hmun hi tlawhpawh rihlo se an duh thu an sawi a ni.