Mizoram-ah COVID-19 hri kai mi 9 hmuh belh

Niminpiah-a Mizoram-a Sample enfiah te atangin COVID-19 hri kai mi 9 hmuh belh an ni a, a tam zawk chu State pawn atanga rawn lut an ni.

Niminpiah khan ZMC Laboratory-ah Sample 384 enfiah niin hri kai hmuh thar an awm lova, District hrang hranga TrueNat Laboratory-ah Sample 164 enfiah niin hri kai mi 5 hmuh niin Rapid Antigen Test hmanga Sample 358 enfiah atangin hri kai mi 4 hmuh an ni bawk.

Niminpiah-a TrueNat Laboratory-a hri kai hmuhchhuah mi 5 zinga mi 4 te hi BSF sipai niin State pawn atanga rawn lut vek an ni a, an zinga pathum hi Lunglei District-a hri kai hmuh te niin pakhat hi Serchhip District-a hri kai hmuh a ni a, hri kai hmuhchhuah dang pakhat hi Khaw-zawl District-a hri kai hmuhchhuah niin State pawn atanga rawn haw a ni bawk.

Rapid Antigen Test hmanga hri kai hmuh thar mi 4 zinga pahnih te hi Lawngtlai District-a hri kai hmuh niin tualchhung-a hri inkaichhawng ve ve an ni a, midang pahnih te hi Aizawl District mi ve ve niin Lunglei-a an zinna a hri an kai tih hmuhchhuah te an ni bawk.

Nimin khan Mizoram-ah hri kai mi 10 te chu enkawl dam leh niin heti hian nimin tlai dar 5:00 thleng khan Mizoram-ah COVID-19 hri kai hmuhchhuah chu 3977 an tling ta a, an zinga 3782 te chu enkawl dam ni tawhin tunah hian hri kai enkawllai 189 an la awm mek a, Mizoram-a hri kai hmuhchhuah atangin za zela 95.09% te chu enkawl dam ni tawhin hri kai zingah nunna chan 6 an awm tawh bawk a ni.